ടെഹ്റാൻ: ചൊവ്വാഴ്ച രാത്രിയുണ്ടായ അമേരിക്കൻ വ്യോമാക്രമണത്തിൽ ഇറാനിലെ ഹോർമോസ്ഗാൻ പ്രവിശ്യയിൽ തകർന്ന അടിസ്ഥാന സൗകര്യങ്ങൾ അടിയന്തരമായി പുരോഗതിപ്പെടുത്തി ജലവിതരണം പൂർണ്ണമായി പുനഃസ്ഥാപിച്ചു. ആക്രമണം നടന്ന് കൃത്യം 12 മണിക്കൂറിനുള്ളിൽ തന്നെ ഹോർമോസ്ഗാനിലെ സിരിക് കൗണ്ടിയിലുള്ള കോഹ്സ്റ്റാക് നഗരത്തിലും ബമാനി ജില്ലയിലെ വിവിധ ഗ്രാമങ്ങളിലുമുള്ള വീടുകളിലേക്ക് കുടിവെള്ള വിതരണം വീണ്ടും സുഗമമാക്കിയതായി ഹോർമോസ്ഗാൻ മേഖലയിലെ വാട്ടർ യൂട്ടിലിറ്റി കമ്പനിയെ ഉദ്ധരിച്ച് ഇറാന്റെ ഔദ്യോഗിക വാർത്താ ഏജൻസിയായ ഇസ്ന റിപ്പോർട്ട് ചെയ്തു.
യു.എസ് നടത്തിയ വ്യോമാക്രമണത്തിൽ മേഖലയിലെ രണ്ട് കോൺക്രീറ്റ് ജലസംഭരണികൾക്ക് (Water Storage Reservoirs) കടുത്ത കേടുപാടുകൾ സംഭവിച്ചതായി വെസ്റ്റ് ഏഷ്യ ന്യൂസ് ഏജൻസി റിപ്പോർട്ട് ചെയ്തിരുന്നു. അമേരിക്ക തങ്ങളുടെ അത്യാധുനിക കൃത്യതയാർന്ന യുദ്ധസാമഗ്രികൾ ഉപയോഗിച്ചാണ് ഈ ജലസംഭരണികളെ ലക്ഷ്യമിട്ട് തകർത്തതെന്ന് പ്രമുഖ അന്താരാഷ്ട്ര മാധ്യമമായ ന്യൂയോർക്ക് ടൈംസ് നടത്തിയ വിശകലനത്തിൽ വ്യക്തമാക്കുന്നുണ്ട്.
അന്താരാഷ്ട്ര മാനുഷിക നിയമപ്രകാരം കുടിവെള്ള വിതരണ സംവിധാനങ്ങളും അതിന്റെ അടിസ്ഥാന സൗകര്യങ്ങളും സാധാരണക്കാരുടെ സ്വത്തായിട്ടാണ് തരംതിരിച്ചിരിക്കുന്നത്. അതിനാൽ തന്നെ യുദ്ധസമയങ്ങളിൽ ഇവയ്ക്ക് നേരെ ആക്രമണം നടത്തുന്നത് തികച്ചും നിയമവിരുദ്ധമാണെന്നിരിക്കെയാണ് അമേരിക്കയുടെ ഭാഗത്തുനിന്നും ഇത്തരമൊരു നീക്കമുണ്ടായത്. എന്നാൽ യുദ്ധകാലാടിസ്ഥാനത്തിൽ പണികൾ പൂർത്തിയാക്കാൻ സാധിച്ചതിനാൽ ജനങ്ങളുടെ ജലക്ഷാമം ഒഴിവാക്കാൻ സാധിച്ചതായി ഇറാൻ അധികൃതർ അറിയിച്ചു..
