ടെഹ്റാൻ: ആഴ്ചകളായി തുടരുന്ന കടുത്ത സൈനിക സംഘർഷങ്ങൾക്കും തർക്കങ്ങൾക്കും ഒടുവിൽ, അമേരിക്കയുമായുള്ള സമാധാന ഉടമ്പടി പ്രഖ്യാപനത്തിന്റെ തൊട്ടരികിലാണെന്ന നിർണ്ണായക വെളിപ്പെടുത്തലുമായി ഇറാൻ വിദേശകാര്യമന്ത്രി അബ്ബാസ് അരാഖ്ചി ഇരുരാജ്യങ്ങളും തമ്മിൽ തയ്യാറാക്കിക്കൊണ്ടിരിക്കുന്ന ‘ഇസ്ലാമാബാദ് ധാരണാപത്രം’ അതിന്റെ അന്തിമ ഘട്ടത്തിലാണെന്നും ചരിത്രത്തിൽ “ഇത്രയും അനുകൂലമായ ഒരു സാഹചര്യം മുൻപെങ്ങും ഉണ്ടായിട്ടില്ലെന്നും” അദ്ദേഹം ഔദ്യോഗികമായി പ്രസ്താവിച്ചു. സോഷ്യൽ മീഡിയ പ്ലാറ്റ്ഫോമായ ‘എക്സി’ലൂടെയാണ് യു.എസ്-ഇറാൻ യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളിൽ വലിയ പുരോഗതിയുണ്ടായതായി വിദേശകാര്യമന്ത്രി വ്യക്തമാക്കിയത്.
അതേസമയം, ധാരണാപത്രത്തിൽ ഉൾപ്പെടുത്തിയിരിക്കുന്ന വ്യവസ്ഥകളെയും ഉള്ളടക്കത്തെയും കുറിച്ച് മാധ്യമങ്ങൾ സ്വന്തം നിലയ്ക്ക് ഊഹാപോഹങ്ങൾ പ്രചരിപ്പിക്കരുതെന്ന് അരാഖ്ചി കർശനമായി നിർദ്ദേശിച്ചു. ചർച്ചകൾ ഇപ്പോഴും സജീവമായി പുരോഗമിക്കുകയാണെന്നും, കരാർ ഒപ്പുവെച്ച് നടപടിക്രമങ്ങൾ പൂർത്തിയാകുന്ന മുറയ്ക്ക് മുഴുവൻ വിവരങ്ങളും ഉത്തരവാദിത്തത്തോടെയും സുതാര്യമായും പൊതുജനങ്ങളുമായി പങ്കുവെക്കുമെന്നും അദ്ദേഹം കൂട്ടിച്ചേർത്തു. ആണവ പദ്ധതികൾ താൽക്കാലികമായി നിർത്തിവെക്കൽ, ഹോർമുസ് കടലിടുക്ക് തുറന്നുനൽകൽ, മരവിപ്പിച്ച ഇറാൻ ഫണ്ടുകൾ തിരികെ നൽകൽ എന്നിവയെക്കുറിച്ചുള്ള യു.എസ് മാധ്യമങ്ങളുടെ റിപ്പോർട്ടുകൾ പുറത്തുവരുന്ന പശ്ചാത്തലത്തിലാണ് ഇറാന്റെ ഈ പ്രതികരണം.
അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാന്റെ വിദേശകാര്യമന്ത്രിയുടെ ഈ പോസ്റ്റ് സ്വന്തം അക്കൗണ്ടിലൂടെ പങ്കുവെച്ചുകൊണ്ട് സമാധാന നീക്കങ്ങൾക്ക് അനുകൂലമായ സൂചന നൽകിയിട്ടുണ്ട്. ദിവസങ്ങൾക്ക് മുൻപ് ഇരുരാജ്യങ്ങളും പരസ്പരം മിസൈൽ വർഷം നടത്തുകയും ട്രംപ് കടുത്ത യുദ്ധഭീഷണി മുഴക്കുകയും ചെയ്തിരുന്നെങ്കിലും, ഒമാന്റെയും പാകിസ്ഥാന്റെയും മധ്യസ്ഥതയിൽ നടന്ന രഹസ്യ ചർച്ചകളാണ് ഇപ്പോൾ വലിയൊരു യുദ്ധം ഒഴിവാക്കുന്നതിലേക്ക് വഴിമാറുന്നത്. വരും ആഴ്ചകളിൽ തന്നെ ഈ പ്രാഥമിക ധാരണാപത്രം ഔദ്യോഗികമായി ഒപ്പുവെക്കുമെന്നാണ് വൈറ്റ് ഹൗസ് വൃത്തങ്ങളും നൽകുന്ന സൂചന.
