വാഷിംഗ്ടൺ: അമേരിക്കയിലുടനീളം വിമാനങ്ങൾ പുറപ്പെടുന്നത് താൽക്കാലികമായി നിർത്തിവെച്ചതിനെത്തുടർന്ന് 15 ലക്ഷത്തിലധികം യാത്രക്കാരുടെ യാത്ര തടസ്സപ്പെട്ടതായി അസോസിയേറ്റഡ് പ്രസ് (AP) റിപ്പോർട്ട് ചെയ്തു. വെള്ളിയാഴ്ച ഈസ്റ്റേൺ സമയം (ET) വൈകുന്നേരം 4 മണിക്ക് ശേഷം യുഎസ് വിമാനത്താവളങ്ങളിൽ നിന്ന് പുറപ്പെടാൻ നിശ്ചയിച്ചിരുന്ന, 15 ലക്ഷത്തിലധികം യാത്രക്കാരുള്ള ഏകദേശം 11,000 വിമാനങ്ങളെയാണ് ഈ പ്രതിസന്ധി ബാധിച്ചത്.
രാജ്യത്തെ 22 പ്രാദേശിക എയർ ട്രാഫിക് കൺട്രോൾ സെന്ററുകളുടെ പ്രവർത്തനത്തെ ടെലികമ്മ്യൂണിക്കേഷൻ തകരാർ (വാർത്താവിനിമയ സംവിധാനത്തിലെ തകരാർ) ബാധിച്ചതിനെത്തുടർന്ന് ഫെഡറൽ ഏവിയേഷൻ അഡ്മിനിസ്ട്രേഷൻ (FAA) സുരക്ഷാ മുൻകരുതലിന്റെ ഭാഗമായി രാജ്യവ്യാപകമായി വിമാനങ്ങൾ നിലത്തിറക്കാൻ ഉത്തരവിടുകയായിരുന്നു. നെറ്റ്‌വർക്ക് റൂട്ടറുകളിലുണ്ടായ സാങ്കേതിക പ്രശ്നമാണ് വാർത്താവിനിമയ സംവിധാനത്തെ ബാധിച്ചതെന്നാണ് പ്രാഥമിക വിവരം.
തകരാർ പരിഹരിച്ചതിനെത്തുടർന്ന് ഈസ്റ്റേൺ സമയം രാത്രി 8:15-ഓടെ വ്യോമപാത വീണ്ടും തുറന്നുകൊടുത്തു. എങ്കിലും, വിമാനത്താവളങ്ങളിലും വിമാനക്കമ്പനികളിലും കെട്ടിക്കിടക്കുന്ന സർവീസുകൾ പഴയപടിയാക്കാൻ സമയമെടുക്കുമെന്നതിനാൽ വിമാനങ്ങൾ വൈകാനും റദ്ദാക്കാനും സാധ്യതയുണ്ടെന്ന് അധികൃതർ അറിയിച്ചു.
