ബെയ്റൂത്ത്: തെക്കൻ ലബനനിൽ ഇസ്രായേൽ തുടർച്ചയായി നടത്തുന്ന ബോംബാക്രമണങ്ങളിൽ കുറഞ്ഞത് 11 പേർ കൊല്ലപ്പെട്ടു. കഴിഞ്ഞ ജൂണിൽ അമേരിക്കയുടെ മധ്യസ്ഥതയിൽ നിലവിൽ വന്ന വെടിനിർത്തൽ കരാറിന് ശേഷം മേഖലയിലുണ്ടാകുന്ന ഏറ്റവും ശക്തമായ ഇസ്രായേൽ ആക്രമണമാണിത്.
തെക്കൻ ലബനനിലെ വിവിധ ജനവാസ മേഖലകളെയും അതിർത്തി ഗ്രാമങ്ങളെയും ലക്ഷ്യമിട്ടാണ് ഇസ്രായേൽ വ്യോമസേന ശക്തമായ ആക്രമണം അഴിച്ചുവിട്ടത്. ബോംബാക്രമണത്തിൽ നിരവധി കെട്ടിടങ്ങൾ തകരുകയും ഒട്ടേറെ പേർക്ക് പരിക്കേൽക്കുകയും ചെയ്തിട്ടുണ്ട്. വെടിനിർത്തൽ കരാർ നിലനിൽക്കെ ഇസ്രായേൽ നടത്തുന്ന ഈ വ്യോമാക്രമണം മേഖലയിലെ സമാധാന അന്തരീക്ഷത്തെ വൻതോതിൽ ബാധിക്കുകയും സംഘർഷം വീണ്ടും രൂക്ഷമാക്കുകയും ചെയ്തിട്ടുണ്ട്.
