ന്യൂഡൽഹി: മണിക്കൂറുകൾ പിന്നിട്ടിട്ടും അയവില്ലാതെ രാജ്യതലസ്ഥാനത്തെ തെരഞ്ഞെടുപ്പ് കമ്മീഷൻ ഓഫീസ് ഉപരോധ സമരം. ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയും പ്രിയങ്ക ഗാന്ധി എം.പിയും ഉൾപ്പെടെയുള്ള മുതിർന്ന പ്രതിപക്ഷ നേതാക്കൾ ആകാശവാണി ഭവൻ വളപ്പിലും പരിസരത്തും സമരം തുടരുകയാണ്. കക്ഷിരാഷ്ട്രീയ വ്യത്യാസങ്ങൾ മാറ്റിവെച്ച് ഇൻഡ്യ മുന്നണിയിലെ മുഴുവൻ എം.പിമാരും തെരുവിൽ ഉറച്ചുനിൽക്കുന്നതോടെ ഡൽഹി പാർലമെന്റ് സ്ട്രീറ്റിൽ വൻ സംഘർഷാവസ്ഥയാണ് നിലനിൽക്കുന്നത്.
പ്രതിഷേധം അടിച്ചമർത്താൻ പൊലീസ് നടത്തിയ ബലപ്രയോഗത്തിലും നാടകീയ രംഗങ്ങളിലുമാണ് പ്രതിഷേധം കൊടിയേറ്റത്തിലേക്ക് നീങ്ങിയത്. അഞ്ചോളം പൊലീസ് ബാരിക്കേഡുകൾക്ക് മുകളിലേക്ക് സാഹസികമായി ചാടിക്കയറിയ രാഹുൽ ഗാന്ധി, ദേശീയപതാകയേന്തി അണിനിരന്ന സമരാനുകൂലികളെ അഭിവാദ്യം ചെയ്തു. തുടർന്ന് പൊലീസും സുരക്ഷാ സേനയും ചേർന്ന് രാഹുൽ ഗാന്ധിയെയും പ്രിയങ്കയെയും അറസ്റ്റ് ചെയ്ത് ബസ്സിലേക്ക് മാറ്റിയെങ്കിലും, പൊലീസ് ബസ്സിൽ നിന്ന് ചാടിയിറങ്ങി ഇരുവരും വീണ്ടും സമരമുഖത്തേക്ക് തിരികെയെത്തി ആകാശവാണി ഭവനിൽ നിലയുറപ്പിക്കുകയായിരുന്നു.
പ്രതിഷേധക്കാരെ പൊലീസ് ബലംപ്രയോഗിച്ച് നീക്കാൻ ശ്രമിക്കുന്നതിനിടെ പലർക്കും പരുക്കേറ്റതായും വിവരമുണ്ട്. മുഖ്യ തെരഞ്ഞെടുപ്പ് കമ്മീഷണറെ നേരിട്ട് കണ്ട് നിവേദനം നൽകാൻ അനുവദിക്കാതെ ഒരടി പോലും പിന്നോട്ടില്ലെന്ന ഉറച്ച നിലപാടിലാണ് പ്രതിപക്ഷം. രാജ്യത്തെ ജനാധിപത്യ സംവിധാനങ്ങളും ഭരണഘടനയും സംരക്ഷിക്കാനുള്ള വിട്ടുവീഴ്ചയില്ലാത്ത പോരാട്ടമാണിതെന്നും അടിച്ചമർത്തലുകൾക്ക് മുന്നിൽ വഴങ്ങില്ലെന്നും എം.പിമാർ വ്യക്തമാക്കി.
