ന്യൂഡൽഹി: രാജ്യത്തെ ജനാധിപത്യ സംവിധാനങ്ങളെയും തെരഞ്ഞെടുപ്പ് പ്രക്രിയയുടെ നിഷ്പക്ഷതയെയും അട്ടിമറിക്കുന്നുവെന്നാരോപിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ പദവി ഒഴിയണമെന്ന് ആവശ്യപ്പെട്ട് ഇന്ത്യാ മുന്നണിയുടെ നേതൃത്വത്തിൽ ഡൽഹിയിൽ നടത്തിയ ബഹുജന മാർച്ച് ചരിത്രമായി. എസ്‌.ഐ.ആർ (SIR) വോട്ടർ പട്ടിക ക്രമക്കേടുകൾക്കും വോട്ട് മോഷണത്തിനുമെതിരെ ലോക്‌സഭ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ കൊണാട്ട് പ്ലേസിൽ നിന്നും കോൺസ്റ്റിറ്റ്യൂഷൻ ക്ലബ്ബിൽ നിന്നും ആരംഭിച്ച ‘ചലോ സുപ്രീം കോടതി’ മാർച്ച് രാജ്യതലസ്ഥാനത്തെ അസാധാരണ സമരവേദിയാക്കി. ആയിരക്കണക്കിന് പ്രവർത്തകരും വിവിധ രാഷ്ട്രീയ-യുവജന സംഘടനകളും അണിനിരന്ന മാർച്ച് ഡൽഹി ഇതുവരെ കാണാത്ത വലിയ ജനകീയ പ്രക്ഷോഭമായി മാറി.
പ്രതിപക്ഷ നേതാക്കൾ സഞ്ചരിച്ച ബസുകൾ ബാരിക്കേഡുകൾ തീർത്ത് വഴിയിൽ തടയാൻ ഡൽഹി പോലീസും കേന്ദ്രസേനയും ശ്രമിച്ചെങ്കിലും, അതൊന്നും വകവെക്കാതെ നേതാക്കളും പ്രവർത്തകരും കാൽനടയായി മുന്നോട്ട് നീങ്ങുകയായിരുന്നു. സുപ്രീം കോടതിക്ക് 200 മീറ്റർ മാത്രം അകലെ വെച്ച് പോലീസ് സ്ഥാപിച്ച ശക്തമായ ഇരുമ്പ് ബാരിക്കേഡുകൾ ഭേദിച്ച് പ്രവർത്തകർ മുന്നേറിയതോടെ പ്രദേശത്ത് സംഘർഷഭരിതമായ അന്തരീക്ഷം രൂപപ്പെട്ടു. രാജ്യത്തിന്റെ ഭരണഘടനയും വോട്ടവകാശവും സംരക്ഷിക്കാൻ ഏതറ്റം വരെയും പോരാടുമെന്ന് പ്രഖ്യാപിച്ച രാഹുൽ ഗാന്ധി, ഗ്യാനേഷ് കുമാർ രാജിവെക്കുന്നതുവരെ ഈ സമരം ഒട്ടേറെ വെല്ലുവിളികളെ അതിജീവിച്ച് ശക്തമായി തുടരുമെന്ന് വ്യക്തമാക്കി.
നേരത്തെ, വിഷയത്തിൽ ചീഫ് ജസ്റ്റിസിനെ നേരിൽ കണ്ട് നിവേദനം നൽകാൻ അനുമതി തേടിയെങ്കിലും കോടതിയുടെ പരിഗണനയിലിരിക്കുന്ന വിഷയമായതിനാൽ ഔദ്യോഗികമായി ഹർജി സമർപ്പിക്കാനാണ് ചീഫ് ജസ്റ്റിസ് നിർദ്ദേശിച്ചിരുന്നത്. ഇതിന്റെ അടിസ്ഥാനത്തിൽ രാഹുൽ ഗാന്ധിയുടെയും ഇന്ത്യാ മുന്നണി നേതാക്കളുടെയും നേതൃത്വത്തിലുള്ള അഭിഭാഷക സംഘം സുപ്രീം കോടതിയിൽ റിട്ട് ഹർജി ഫയൽ ചെയ്യുകയും ചെയ്തു. തെരുവിൽ ഭരണകൂടത്തിന്റെ നിയന്ത്രണങ്ങളെയും സുരക്ഷാ തടസ്സങ്ങളെയും അതിജീവിച്ചുള്ള ഈ ചരിത്രപരമായ ജനാധിപത്യ പോരാട്ടം ഇന്ത്യൻ രാഷ്ട്രീയ ചരിത്രത്തിലെ നിർണ്ണായക ഏടായി മാറിക്കഴിഞ്ഞു.
