തിരുവനന്തപുരം: സംസ്ഥാന വഖഫ് ബോർഡ് സമ്പൂർണ്ണമായി പുനഃസംഘടിപ്പിച്ച് കേരള സർക്കാർ ഉത്തരവിറക്കി. മുസ്ലിം ലീഗ് നേതാവും പ്രമുഖ വഖഫ് കാര്യവിദഗ്ദ്ധനുമായ എം.സി. മായിൻ ഹാജിയാണ് പുതിയ വഖഫ് ബോർഡ് ചെയർമാൻ. ബോർഡിലേക്ക് അമുസ്ലിം അംഗങ്ങളെ നാമനിർദേശം ചെയ്തിട്ടില്ല. രണ്ട് അമുസ്ലിം അംഗങ്ങളെ നിയമിക്കുന്നതുമായി ബന്ധപ്പെട്ട് സുപ്രീം കോടതിയിലും ഹൈക്കോടതിയിലും നിലനിൽക്കുന്ന കേസുകളിലെ അന്തിമ വിധിക്ക് വിധേയമായിരിക്കും നിലവിലെ ഘടനയെന്ന് ഉത്തരവിൽ എടുത്തുപറഞ്ഞിട്ടുണ്ട്.
ആകെയുള്ള 11 അംഗങ്ങളിൽ 9 പേരെയാണ് സർക്കാർ ഇപ്പോൾ പുതിയ സമിതിയിലേക്ക് തെരഞ്ഞെടുത്തിരിക്കുന്നത്. കുറുക്കോളി മൊയ്തീൻ എം.എൽ.എ, എം.പി. മുസ്തഫൽ ഫൈസി, തൊടിയൂർ മുഹമ്മദ് കുഞ്ഞ് മൗലവി, സിറാജ് ഡി. കപസി, സജ്ന ഫിറോസ്, ജസീം സബാഹ്, ഡോ. അബ്ദുൽ മജീദ് സ്വലാഹി, മദീന ബീഗം എന്നിവരാണ് പുതിയ ബോർഡിലെ മറ്റ് അംഗങ്ങൾ. സമസ്ത, ദക്ഷിണ കേരള ജംഇയ്യത്തുൽ ഉലമ, കേരള നദ്‌വത്തുൽ മുജാഹിദീൻ തുടങ്ങിയ പ്രമുഖ ഇസ്ലാമിക സംഘടനകളുടെ കൃത്യമായ പ്രാതിനിധ്യത്തോടൊപ്പം തദ്ദേശ ഭരണ സ്ഥാപനങ്ങളിലെ ജനപ്രതിനിധികളെയും ഉൾപ്പെടുത്തിയാണ് പുതിയ ഭരണസമിതി രൂപീകരിച്ചിരിക്കുന്നത്. കെ.എസ്. ഹംസയുടെ നേതൃത്വത്തിലുണ്ടായിരുന്ന മുൻ സമിതിയുമായി വഖഫ് ഭരണകാര്യങ്ങളിൽ ചില തർക്കങ്ങൾ നിലനിന്നിരുന്ന സാഹചര്യത്തിലാണ് ഈ സമ്പൂർണ്ണ പുനഃസംഘടന.
