വാഷിംഗ്ടൺ: അയൽരാജ്യങ്ങളായ തായ്ലൻഡും കംബോഡിയയും തമ്മിലുള്ള അതിർത്തി തർക്കത്തെത്തുടർന്നുള്ള പോരാട്ടം അവസാനിപ്പിക്കാൻ വെടിനിർത്തൽ കരാർ പ്രഖ്യാപിച്ച് യുഎസ് പ്രസിഡന്റ് ഡൊണാൾഡ് ട്രംപ്. ആഴ്ചകൾ നീണ്ട സംഘർഷത്തിനൊടുവിൽ തന്റെ മധ്യസ്ഥതയിലാണ് ഇരുരാജ്യങ്ങളും സമാധാനത്തിലേക്ക് തിരിച്ചെത്തിയതെന്ന് ട്രംപ് അവകാശപ്പെട്ടു. കഴിഞ്ഞ എട്ട് മാസത്തിനിടെ എട്ട് ആഗോള സംഘർഷങ്ങൾ പരിഹരിച്ചതായി ചൂണ്ടിക്കാട്ടിയ അദ്ദേഹം, “അമേരിക്കയാണ് യഥാർഥ ഐക്യരാഷ്ട്രസഭ” എന്ന് പരിഹസിക്കുകയും ചെയ്തു. ലോകസമാധാനത്തിനായി ഐക്യരാഷ്ട്രസഭയേക്കാൾ ഫലപ്രദമായി പ്രവർത്തിക്കുന്നത് അമേരിക്കയാണെന്ന തന്റെ വാദം ട്രൂത്ത് സോഷ്യൽ പ്ലാറ്റ്ഫോമിലൂടെയാണ് അദ്ദേഹം പങ്കുവെച്ചത്.
ശനിയാഴ്ച നടന്ന ചർച്ചകൾക്കൊടുവിൽ തായ്ലൻഡും കംബോഡിയയും വെടിനിർത്തൽ കരാറിൽ ഒപ്പുവെക്കുകയായിരുന്നു. ഉക്രെയ്ൻ പ്രസിഡന്റ് വോളോഡിമർ സെലെൻസ്കിയുമായി നിർണ്ണായക കൂടിക്കാഴ്ച നടക്കാനിരിക്കെ, തായ്-കംബോഡിയ വിഷയത്തിലെ ഈ നയതന്ത്ര വിജയം ട്രംപ് വലിയ നേട്ടമായാണ് ഉയർത്തിക്കാട്ടുന്നത്. റഷ്യ-ഉക്രെയ്ൻ യുദ്ധം ഉൾപ്പെടെയുള്ള സങ്കീർണ്ണമായ ആഗോള പ്രശ്നങ്ങളിൽ മറ്റ് അന്താരാഷ്ട്ര സ്ഥാപനങ്ങളുടെ സഹായമില്ലാതെ തന്നെ അമേരിക്ക നേരിട്ട് ഇടപെടുന്നുണ്ടെന്നും ട്രംപ് അവകാശപ്പെട്ടു. ട്രംപിന്റെ ഈ പ്രസ്താവന ആഗോളതലത്തിൽ വലിയ ചർച്ചകൾക്കും പ്രതികരണങ്ങൾക്കും വഴിതുറന്നിട്ടുണ്ട്.
