റിയാദ്: സൗദി അറേബ്യയുടെ ‘സ്പെഷ്യൽ ടാലന്റ്’ പ്രീമിയം റെസിഡൻസി പദ്ധതിക്കായി 3,484 സ്വകാര്യ സ്ഥാപനങ്ങൾക്ക് റെസിഡൻസി സെന്റർ അംഗീകാരം നൽകി. ശാസ്ത്രം, ഗവേഷണം, ഭരണനിർവ്വഹണം തുടങ്ങിയ മേഖലകളിൽ മികച്ച കഴിവ് തെളിയിച്ച വിദേശികൾക്ക് ഈ സ്ഥാപനങ്ങളിൽ ജോലി ഉണ്ടെങ്കിൽ പ്രീമിയം റെസിഡൻസിക്ക് അപേക്ഷിക്കാം. ശാസ്ത്ര-ആരോഗ്യ മേഖലയിലുള്ളവർക്ക് കുറഞ്ഞത് 14,000 റിയാലും, സീനിയർ എക്സിക്യൂട്ടീവ് തസ്തികയിലുള്ളവർക്ക് 80,000 റിയാലും പ്രതിമാസ ശമ്പളം ഉണ്ടായിരിക്കണം എന്നതാണ് പ്രധാന നിബന്ധനകളിൽ ഒന്ന്. ബാച്ചിലർ ബിരുദവും മൂന്ന് വർഷത്തെ പ്രവൃത്തിപരിചയവും അപേക്ഷകർക്ക് നിർബന്ധമാണ്.
ഈ പദ്ധതി പ്രകാരം റെസിഡൻസി ലഭിക്കുന്നവർക്ക് കുടുംബത്തോടൊപ്പം സൗദിയിൽ താമസിക്കാനും, തൊഴിലുടമയെ മാറാനും, ആശ്രിതർക്കുള്ള ലെവിയിൽ നിന്ന് ഇളവ് നേടാനും സാധിക്കും. കൂടാതെ, നിശ്ചിത മാനദണ്ഡങ്ങൾ പാലിക്കുന്നവർക്ക് പിൽക്കാലത്ത് സ്ഥിര താമസത്തിനുള്ള (Permanent Residency) അർഹതയും ലഭിക്കും. സൗദിയുടെ വിഷൻ 2030-ന്റെ ഭാഗമായി വിദേശത്തുള്ള പ്രതിഭകളെ ആകർഷിക്കാനും അറിവ് കൈമാറ്റം പ്രോത്സാഹിപ്പിക്കാനുമാണ് ഈ നടപടിയിലൂടെ രാജ്യം ലക്ഷ്യമിടുന്നത്. ഇതിനകം തന്നെ 140-ലധികം രാജ്യങ്ങളിൽ നിന്നുള്ള പ്രതിഭകൾ ഈ പദ്ധതിക്കായി അപേക്ഷ സമർപ്പിച്ചിട്ടുണ്ടെന്ന് അധികൃതർ വ്യക്തമാക്കി.
