കൊച്ചി: പാലാരിവട്ടത്ത് സൗഹൃദം നടിച്ച് അപ്പാർട്ട്മെന്റിലേക്ക് വിളിച്ചുവരുത്തിയ യുവാവിനെ തടഞ്ഞുവെച്ച് ക്രൂരമായി മർദിക്കുകയും ലക്ഷങ്ങൾ കവരുകയും ചെയ്തു. പെരുമ്പാവൂർ വെങ്ങോല സ്വദേശിയായ കെ.വി. സന്ദീപിനാണ് (34) ഈ ദുരനുഭവം ഉണ്ടായത്. മാർച്ച് 30-ന് വൈകുന്നേരം സന്ദീപിന്റെ സുഹൃത്തായ മനു എന്നയാൾ പാലാരിവട്ടത്തെ അപ്പാർട്ട്മെന്റിലേക്ക് സന്ദീപിനെ വിളിച്ചുവരുത്തുകയായിരുന്നു. അവിടെയെത്തിയ സന്ദീപിനെ മനുവും മറ്റ് മൂന്ന് കൂട്ടാളികളും ചേർന്ന് തടഞ്ഞുവെക്കുകയും യാതൊരു പ്രകോപനവുമില്ലാതെ അതിക്രൂരമായി മർദിക്കുകയും ചെയ്തു. മർദനത്തിന്റെ ആഘാതത്തിൽ വാരിയെല്ല് പൊട്ടുകയും ശരീരമാസകലം ഗുരുതരമായി പരുക്കേൽക്കുകയും ചെയ്ത സന്ദീപ് നിലവിൽ കോലഞ്ചേരി മെഡിക്കൽ കോളേജ് ആശുപത്രിയിൽ ചികിത്സയിലാണ്.
മർദനത്തിന് ശേഷം സന്ദീപിന്റെ മൊബൈൽ ഫോൺ ബലമായി പിടിച്ചുവാങ്ങിയ സംഘം, വാലറ്റ് ആപ്പ് (Wallet App) ഉപയോഗിച്ച് 24,757 രൂപ മറ്റൊരു അക്കൗണ്ടിലേക്ക് മാറ്റി. ഇതിന് പുറമെ പേഴ്സിലുണ്ടായിരുന്ന 13,000 രൂപയും സംഘം കവർന്നു. അവശനായ സന്ദീപിനെ അപ്പാർട്ട്മെന്റിൽ ഉപേക്ഷിച്ചാണ് പ്രതികൾ കടന്നുകളഞ്ഞത്. ആശുപത്രി അധികൃതർ വിവരമറിയിച്ചതിനെ തുടർന്ന് പാലാരിവട്ടം പൊലിസ് സ്ഥലത്തെത്തി സന്ദീപിന്റെ മൊഴി രേഖപ്പെടുത്തിയിട്ടുണ്ട്. മുഖ്യപ്രതിയായ മനുവിനെയും കൂടെയുണ്ടായിരുന്ന മറ്റ് മൂന്ന് പേരെയും തിരിച്ചറിഞ്ഞതായും സിസിടിവി ദൃശ്യങ്ങൾ കേന്ദ്രീകരിച്ച് ഇവർക്കായി തിരച്ചിൽ ഊർജിതമാക്കിയതായും പൊലിസ് അറിയിച്ചു. സമാനമായ രീതിയിൽ സൗഹൃദം നടിച്ച് കുറ്റകൃത്യങ്ങൾ നടത്തുന്ന സംഘങ്ങൾ നഗരത്തിൽ സജീവമാണോ എന്ന കാര്യവും പൊലിസ് അന്വേഷിക്കുന്നുണ്ട്.
