വാഷിങ്ടൺ: പാകിസ്ഥാനിലെ ഇസ്ലാമാബാദിൽ നടക്കാനിരിക്കുന്ന സമാധാന ചർച്ചകൾ പരാജയപ്പെടുകയാണെങ്കിൽ ഇറാനെതിരെ വീണ്ടും സൈനിക നടപടിയുണ്ടാകുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ന്യൂയോർക്ക് പോസ്റ്റിന് നൽകിയ അഭിമുഖത്തിലാണ് അദ്ദേഹം ഈ കടുത്ത നിലപാട് വ്യക്തമാക്കിയത്. ചർച്ചകളിൽ ഒരു കരാറിലെത്താൻ സാധിക്കാത്ത പക്ഷം ഇറാനെ ആക്രമിക്കുന്നതിനായി അമേരിക്കൻ യുദ്ധക്കപ്പലുകളിൽ അത്യാധുനിക വെടിക്കോപ്പുകളും ലോകത്തിലെ തന്നെ ഏറ്റവും മികച്ച ആയുധങ്ങളും നിറച്ചുകൊണ്ടിരിക്കുകയാണെന്ന് അദ്ദേഹം പറഞ്ഞു.
മുമ്പ് നടത്തിയ ആക്രമണത്തേക്കാൾ പ്രഹരശേഷിയുള്ള ആയുധങ്ങളാണ് ഇപ്പോൾ സജ്ജമാക്കുന്നതെന്നും ഒരു നയതന്ത്ര പരിഹാരമുണ്ടാകാത്ത പക്ഷം ഇവ അതീവ ഫലപ്രദമായി ഉപയോഗിക്കുമെന്നും ട്രംപ് കൂട്ടിച്ചേർത്തു. നിലവിൽ സമാധാനത്തിനായി ഒരു ‘റീസെറ്റ്’ (Reset) നടക്കുന്നുണ്ടെങ്കിലും സൈനിക നടപടിക്കുള്ള തയ്യാറെടുപ്പുകളിൽ നിന്ന് പിന്നോട്ടില്ലെന്ന സൂചനയാണ് ട്രംപിന്റെ വാക്കുകൾ നൽകുന്നത്. ഇസ്ലാമാബാദിൽ നിർണ്ണായകമായ ഉഭയകക്ഷി ചർച്ചകൾ തുടങ്ങാനിരിക്കെ ട്രംപ് നടത്തിയ ഈ പ്രസ്താവന മേഖലയിൽ വീണ്ടും സമ്മർദ്ദവും ആശങ്കയും വർദ്ധിപ്പിച്ചിരിക്കുകയാണ്.
