ന്യൂഡൽഹി: ആഗോള രാഷ്ട്രീയ സാഹചര്യങ്ങളും ഇന്ധനവില വർധനയും കാരണം രാജ്യത്തെ വിമാന സർവീസുകൾ ഏതുനിമിഷവും നിലച്ചുപോകുന്ന അവസ്ഥയിലാണെന്ന് വിമാനക്കമ്പനികൾ കേന്ദ്ര സർക്കാരിനെ അറിയിച്ചു. ഇന്ത്യൻ വ്യോമയാന വിപണിയുടെ 95 ശതമാനവും കൈകാര്യം ചെയ്യുന്ന എയർ ഇന്ത്യ, ഇൻഡിഗോ, സ്പൈസ് ജെറ്റ് എന്നീ കമ്പനികളാണ് വ്യോമയാന മന്ത്രാലയത്തിന് മുന്നിൽ ആശങ്ക അറിയിച്ചത്. ഇറാൻ യുദ്ധവും ഹോർമുസ് കടലിടുക്കിന്റെ ഭാഗികമായ അടച്ചുപൂട്ടലും കാരണം വിമാന ഇന്ധനത്തിന്റെ (ATF) വില കുതിച്ചുയരുന്നതാണ് പ്രധാന പ്രതിസന്ധി. ലോകത്തിലെ അഞ്ചാമത്തെ വലിയ വ്യോമയാന വിപണിയായ ഇന്ത്യയെ സംബന്ധിച്ചിടത്തോളം ഈ സാഹചര്യം അതീവ ഗുരുതരമാണ്.
യുദ്ധം മൂലം വ്യോമപാതകളിൽ ഏർപ്പെടുത്തിയിട്ടുള്ള നിയന്ത്രണങ്ങൾ കാരണം ദീർഘദൂര സർവീസുകൾക്ക് വലിയ രീതിയിലുള്ള അധികച്ചെലവാണ് ഉണ്ടാകുന്നത്. ഒരു വിമാനക്കമ്പനിയുടെ പ്രവർത്തനച്ചെലവിന്റെ ഏകദേശം 40 ശതമാനവും ഇന്ധനത്തിനായാണ് ചെലവാകുന്നത്. നിലവിലെ സാഹചര്യത്തിൽ വിമാന ഇന്ധനത്തിന്റെ വിലനിർണ്ണയ രീതിയിൽ അടിയന്തരമായ മാറ്റം വരുത്തണമെന്ന് കമ്പനികൾ ആവശ്യപ്പെട്ടു. ആഭ്യന്തര, അന്തർദേശീയ സർവീസുകൾക്ക് ഒരേപോലെ ബാധകമായ രീതിയിൽ ഇന്ധന വിലനിർണ്ണയ സംവിധാനം ഏകീകരിക്കണമെന്ന് ഫെഡറേഷൻ ഓഫ് ഇന്ത്യൻ എയർലൈൻസ് (FIA) സിവിൽ ഏവിയേഷൻ മന്ത്രാലയത്തോട് അഭ്യർത്ഥിച്ചു. സർക്കാർ ഇടപെടൽ വൈകിയാൽ രാജ്യത്തെ വ്യോമയാന മേഖല പൂർണ്ണമായും സ്തംഭിക്കുന്ന സാഹചര്യമുണ്ടാകുമെന്നും പ്രസ് ട്രസ്റ്റ് ഓഫ് ഇന്ത്യ (PTI) റിപ്പോർട്ട് ചെയ്തു.
