ലണ്ടൻ: സ്വന്തം പാർട്ടിക്കുള്ളിൽ നിന്നും ഉയർന്ന കടുത്ത രാഷ്ട്രീയ സമ്മർദ്ദങ്ങൾക്കൊടുവിൽ ബ്രിട്ടീഷ് പ്രധാനമന്ത്രി കെയർ സ്റ്റാർമർ രാജിവെക്കുന്നു. തിങ്കളാഴ്ച ലണ്ടനിലെ ഡൗണിങ് സ്ട്രീറ്റിന് മുന്നിൽ മാധ്യമങ്ങളെ കണ്ടാണ് അദ്ദേഹം തന്റെ രാജി പ്രഖ്യാപനം നടത്തിയത്. പാർലമെന്റ് സെപ്റ്റംബറിൽ വീണ്ടും സമ്മേളിക്കുന്നതിന് മുൻപായി ലേബർ പാർട്ടിക്ക് പുതിയൊരു നേതാവിനെ കണ്ടെത്താൻ സാധിക്കുന്ന വിധത്തിലുള്ള രാജി പ്രക്രിയകളുടെ സമയവിവരപ്പട്ടികയും അദ്ദേഹം പുറത്തുവിട്ടു. 2024 ജൂലൈയിൽ നടന്ന പൊതുതിരഞ്ഞെടുപ്പിൽ 14 വർഷത്തെ കൺസർവേറ്റീവ് ഭരണത്തിന് അന്ത്യം കുറിച്ച് 411 സീറ്റുകളുടെ വൻ ഭൂരിപക്ഷത്തോടെ ലേബർ പാർട്ടിയെ അധികാരത്തിലേറ്റിയ സ്റ്റാർമർക്ക്, രണ്ടു വർഷം തികയുന്നതിന് മുൻപ് തന്നെ കസേര ഒഴിഞ്ഞുകൊടുക്കേണ്ടി വന്നത് യുകെ രാഷ്ട്രീയത്തിൽ വലിയ ചലനങ്ങൾ സൃഷ്ടിച്ചിരിക്കുകയാണ്.
വ്യക്തിപരമായി കഠിനാധ്വാനിയും മാന്യനുമായ ഒരു നേതാവായി എതിരാളികൾ പോലും വിലയിരുത്തുമ്പോഴും, ആധുനിക രാഷ്ട്രീയ ചരിത്രത്തിൽ ജനങ്ങൾ ഏറ്റവും കൂടുതൽ വെറുത്ത ഒരു ബ്രിട്ടീഷ് പ്രധാനമന്ത്രിയായി കെയർ സ്റ്റാർമർ മാറിയെന്നാണ് രാഷ്ട്രീയ നിരീക്ഷകർ ചൂണ്ടിക്കാണിക്കുന്നത്. വ്യക്തമായ ദിശാബോധമില്ലാത്ത നയങ്ങളും ജനങ്ങൾക്കിടയിലുണ്ടായ കടുത്ത അതൃപ്തിയുമാണ് അദ്ദേഹത്തിന്റെ പതനത്തിന് ആക്കം കൂട്ടിയത്. മേയിൽ നടന്ന പ്രാദേശിക, റീജിയണൽ തിരഞ്ഞെടുപ്പുകളിൽ ലേബർ പാർട്ടി നേരിട്ട കടുത്ത പരാജയങ്ങൾക്ക് പിന്നാലെ സ്റ്റാർമറുടെ നേതൃത്വത്തിനെതിരെ പാർട്ടിയിൽ കലാപം പുകയുകയായിരുന്നു. രണ്ടു വർഷത്തിനിടെ അദ്ദേഹത്തിന്റെ മന്ത്രിസഭയിൽ നിന്നും ഇരുപതോളം മന്ത്രിമാരാണ് നയപരമായ ഭിന്നതകളെത്തുടർന്നും നേതൃത്വത്തിലുള്ള വിശ്വാസം നഷ്ടപ്പെട്ടതിനാലും രാജി സമർപ്പിച്ചത്.
അടുത്തിടെ നോർത്ത് വെസ്റ്റ് ഇംഗ്ലണ്ടിലെ മേക്കർഫീൽഡ് ഉപതിരഞ്ഞെടുപ്പിൽ സ്റ്റാർമറുടെ ശക്തനായ രാഷ്ട്രീയ എതിരാളിയും ഗ്രേറ്റർ മാഞ്ചസ്റ്റർ മേയറുമായ ആൻഡി ബേൺഹാം നേടിയ തകർപ്പൻ വിജയമാണ് സ്റ്റാർമറുടെ രാജി അനിവാര്യമാക്കിയത്. ഇതോടെ അദ്ദേഹത്തിന് മേൽ പാർട്ടിയിൽ നിന്നുള്ള സമ്മർദ്ദം അതിന്റെ പരകോടിയിലെത്തുകയായിരുന്നു. ബ്രിട്ടീഷ് പാർലമെന്ററി സംവിധാനമനുസരിച്ച് പൊതുതിരഞ്ഞെടുപ്പ് നടത്താതെ തന്നെ എം.പിമാർക്ക് പുതിയൊരു പ്രധാനമന്ത്രിയെ തിരഞ്ഞെടുക്കാൻ സാധിക്കുമെന്നിരിക്കെ, ആൻഡി ബേൺഹാം യുകെയുടെ അടുത്ത പ്രധാനമന്ത്രിയാകാനാണ് കൂടുതൽ സാധ്യത കൽപ്പിക്കപ്പെടുന്നത്. കെയർ സ്റ്റാർമറുടെ മാന്യമായ ഈ രാജി പ്രഖ്യാപനം പാർട്ടിയെ പുതിയൊരു ദിശയിലേക്ക് നയിക്കാൻ സഹായിക്കുമെന്ന് ലേബർ പാർട്ടി വക്താക്കൾ പ്രതികരിച്ചു. കഴിഞ്ഞ പത്ത് വർഷത്തിനിടയിൽ രാജ്യം കാണുന്ന ഏഴാമത്തെ പ്രധാനമന്ത്രിയെ തിരഞ്ഞെടുക്കാനുള്ള ഒരുക്കത്തിലാണ് ഇപ്പോൾ യുണൈറ്റഡ് കിങ്ഡം.
