വാഷിംഗ്ടൺ: ഇറാന് എതിരായി യു.എസ് ആരംഭിച്ച സൈനിക ആക്രമണങ്ങളെ അമേരിക്കൻ ജനത എതിർക്കുന്നില്ലെന്ന അവകാശവാദവുമായി യു.എസ് പ്രസിഡന്റ് ഡൊണാൾഡ് ട്രംപ്. യുദ്ധത്തിൽ കൊല്ലപ്പെടുന്ന അമേരിക്കൻ സൈനികരുടെ എണ്ണം ഉയരുന്ന സാഹചര്യത്തിൽ ജനങ്ങൾക്കിടയിലെ അമർഷത്തെക്കുറിച്ച് മാധ്യമപ്രവർത്തകർ ചോദിച്ചപ്പോഴാണ് ആക്രമണങ്ങൾ ഇനിയും കടുപ്പിക്കുമെന്ന് ട്രംപ് വ്യക്തമാക്കിയത്. ഇറാന് അതികഠിനമായ തിരിച്ചടി നേരിടേണ്ടി വരുമെന്നും അവരുടെ സൈനിക ശേഷി പൂർണ്ണമായും തകർക്കപ്പെടുകയാണെന്നും ട്രംപ് മാധ്യമങ്ങളോട് പറഞ്ഞു.
അമേരിക്കൻ ജനങ്ങൾക്ക് ഇന്ധനവില വർദ്ധിക്കുന്നതിൽ മാത്രമാണ് ആശങ്കയുള്ളതെന്നും എന്നാൽ അവർ യുദ്ധത്തിന് എതിരല്ലെന്നും പുതിയ സർവേ ഫലങ്ങൾ വ്യക്തമാക്കുന്നുണ്ടെന്ന് ട്രംപ് കൂട്ടിച്ചേർത്തു. പ്രസിഡന്റ് പരാമർശിച്ചത് ഏത് സർവേയാണെന്നത് വ്യക്തമല്ല. കഴിഞ്ഞ ഫെബ്രുവരിയിൽ യാതൊരു പ്രകോപനവുമില്ലാതെ ഇറാനെതിരെ ആരംഭിച്ച ആക്രമണത്തിന് പിന്തുണ കുറയുകയാണെന്നാണ് അമേരിക്കയിൽ നടന്ന ഭൂരിഭാഗം ജനാഭിപ്രായം പ്രവചിക്കുന്ന സർവേകളും ചൂണ്ടിക്കാണിക്കുന്നത്. സൈനികരുടെ മരണത്തിലും സാമ്പത്തിക ബാധ്യതയിലും ആശങ്കാകുലരായ അമേരിക്കൻ പൊതുസമൂഹം യുദ്ധത്തിനെതിരെ രംഗത്തുവരുമ്പോഴാണ് ട്രംപ് ഇത്തരമൊരു വിവാദ അവകാശവാദം ഉന്നയിച്ചിരിക്കുന്നത്.
