ന്യൂഡൽഹി: ഡൽഹിയിൽ തുടരുന്ന ശക്തമായ വിദ്യാർത്ഥി പ്രക്ഷോഭത്തിൽ സമവായമുണ്ടാക്കാൻ കോക്റോച്ച് ജനതാ പാർട്ടി (സി.ജെ.പി) പ്രതിനിധി സംഘം കേന്ദ്രമന്ത്രിമാരുമായി ചർച്ച ആരംഭിച്ചു. ചർച്ചയ്ക്കായി നിഷ്പക്ഷ വേദി വേണമെന്ന സി.ജെ.പിയുടെ ആവശ്യം കേന്ദ്ര സർക്കാർ അംഗീകരിച്ചതിനെ തുടർന്ന് ഭരണഘടനാ ക്ലബ്ബിലാണ് നിർണായക കൂടിക്കാഴ്ച നടക്കുന്നത്. ഡൽഹി ജന്തർ മന്തറിലെ വിദ്യാർത്ഥികളുടെ പ്രതിഷേധ സമരം 35-ാം ദിവസത്തിലേക്ക് കടന്ന പശ്ചാത്തലത്തിലാണ് സർക്കാരും സമരക്കാരുമായി ചർച്ചയ്ക്ക് വഴിയൊരുങ്ങിയത്.
അതേസമയം, കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനെ സ്ഥാനത്തുനിന്ന് പുറത്താക്കാതെ പാർലമെന്റിൽ ചർച്ചയ്ക്ക് തയ്യാറല്ലെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി വ്യക്തമാക്കി. പാർലമെന്റിന് പുറത്ത് മാധ്യമങ്ങളോട് സംസാരിക്കവേ അദ്ദേഹം കേന്ദ്ര സർക്കാറിന് മുന്നിൽ മൂന്ന് പ്രധാന ആവശ്യങ്ങൾ ഉന്നയിച്ചു. അഴിമതിക്കാരനായ വിദ്യാഭ്യാസ മന്ത്രിയെ എത്രയും വേഗം പുറത്താക്കുക, സമരം ചെയ്ത വിദ്യാർത്ഥികളെ തല്ലിച്ചതച്ചവർക്കെതിരെ കർശന നടപടിയെടുക്കുക, സംഭവത്തിൽ പ്രധാനമന്ത്രി നരേന്ദ്ര മോദി വിദ്യാർത്ഥികളോട് മാപ്പ് പറയുക എന്നിവയാണ് രാഹുൽ ഗാന്ധി മുന്നോട്ടുവെച്ച വ്യവസ്ഥകൾ.
ഇതിനിടെ, കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് പ്രതിപക്ഷ കക്ഷികൾ ഉയർത്തിയ ശക്തമായ ബഹളത്തെ തുടർന്ന് ലോക്സഭാ നടപടികൾ ഇന്നത്തേക്ക് നിർത്തിവെച്ചു. സഭ തുടർച്ചയായി തടസ്സപ്പെടുന്നത് തെറ്റായ സന്ദേശം നൽകുമെന്നും സഭാനടപടികളോട് സഹകരിക്കണമെന്നുമുള്ള സർക്കാറിന്റെയും സ്പീക്കറുടെയും അഭ്യർത്ഥനകൾ അംഗീകരിക്കാൻ പ്രതിപക്ഷം തയ്യാറായില്ല.
