വാഷിംഗ്ടൺ: ജോർദാനിലെ യു.എസ് സൈനിക താവളങ്ങൾ ലക്ഷ്യമാക്കി ഇറാൻ ആക്രമണം നടത്തിയതിന് പിന്നാലെ, ഇറാന് കടുത്ത തിരിച്ചടി നൽകുമെന്ന മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. “ഇനി ഞങ്ങളുടെ ഊഴമാണ്” എന്ന് പ്രഖ്യാപിച്ച ട്രംപ്, അമേരിക്ക ഇറാന് വളരെ ശക്തമായ പ്രഹരം തന്നെ നൽകുമെന്ന് വ്യക്തമാക്കി. വൈറ്റ് ഹൗസിലെ ഓവൽ ഓഫീസിൽ വെച്ച് മാധ്യമപ്രവർത്തകരോട് സംസാരിക്കവേയായിരുന്നു അദ്ദേഹത്തിന്റെ പ്രതികരണം.
ഇറാൻ തൊടുത്തുവിട്ട മിസൈലുകളെല്ലാം പ്രതിരോധ സംവിധാനങ്ങൾ ഉപയോഗിച്ച് അമേരിക്ക തകർത്തതായി ട്രംപ് പറഞ്ഞു. എങ്കിലും തങ്ങളുടെ ഭാഗത്തുനിന്നുള്ള പ്രത്യാക്രമണം ഉറപ്പാണെന്നും തങ്ങൾ തിരിച്ചടിക്കാൻ പോവുകയാണെന്ന് ഇറാന് കൃത്യമായി അറിയാമെന്നും അദ്ദേഹം കൂട്ടിച്ചേർത്തു. ആക്രമണം നടത്തരുതെന്ന് ഇറാൻ അമേരിക്കയോട് ആവശ്യപ്പെടുന്നുണ്ടെങ്കിലും ശക്തമായ തിരിച്ചടിയുമായി മുന്നോട്ടുപോകാനാണ് യു.എസ് തീരുമാനം. പശ്ചിമേഷ്യൻ മേഖലയിൽ യുദ്ധ ഭീതിയും സംഘർഷവും അതിരൂക്ഷമായി തുടരുന്നതിനിടയിലാണ് ട്രംപിന്റെ ഈ കടുത്ത പ്രതികരണം.
