ടെഹ്റാൻ: അമേരിക്കയുമായുള്ള സൈനിക സംഘർഷം ആറ് മാസത്തോളമായി തുടരുന്ന സാഹചര്യത്തിൽ ഇറാന്റെ നിലപാടിൽ യാതൊരു വിട്ടുവീഴ്ചയുമില്ലെന്ന് വ്യക്തമാക്കി പുതിയ ദേശീയ സുരക്ഷാ കൗൺസിൽ തലവൻ മോഹ്സെൻ റെസായി. ചൈനീസ് അംബാസഡറുമായി ടെഹ്റാനിൽ നടത്തിയ കൂടിക്കാഴ്ചയ്ക്ക് പിന്നാലെയാണ് അദ്ദേഹം രാജ്യത്തിന്റെ കർശന നിലപാട് പരസ്യമാക്കിയത്. അമേരിക്ക സൈനിക നടപടിയും നാവിക ഉപരോധവും അവസാനിപ്പിക്കുകയും ഇറാന്റെ മരവിപ്പിച്ച സാമ്പത്തിക ആസ്തികൾ വിട്ടുകൊടുക്കുകയും ഗസയിലും ലബനനിലും ഉൾപ്പെടെ മേഖലയിലുടനീളം സമഗ്ര വെടിനിർത്തലിന് തയ്യാറാകുകയും ചെയ്യുന്നത് വരെ ഹോർമുസ് കടലിടുക്ക് പൂർണ്ണമായി തുറക്കില്ലെന്ന് റെസായി വ്യക്തമാക്കി.
ഇസ്ലാമിക് റെവല്യൂഷണറി ഗാർഡ് കോർപ്സിന്റെ (ഐ.ആർ.ജി.സി) മുൻ കമാൻഡർ ഇൻ ചീഫ് കൂടിയായ ഇദ്ദേഹം സോഷ്യൽ മീഡിയ പോസ്റ്റിലൂടെയാണ് എല്ലാ നിബന്ധനകളും പാലിക്കപ്പെടുന്നത് വരെ കടലിടുക്ക് അടഞ്ഞുതന്നെ കിടക്കുമെന്ന് മുന്നറിയിപ്പ് നൽകിയത്. ഇറാൻ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറിയായി ചുമതലയേറ്റ ശേഷം ചൈനീസ് പ്രതിനിധി കോങ് പെയ്വൂവുമായിട്ടായിരുന്നു റെസായിയുടെ ആദ്യ ഔദ്യോഗിക കൂടിക്കാഴ്ച. ചൈനയുമായുള്ള നയതന്ത്ര ബന്ധം ശക്തമാക്കുന്നതിനെ പ്രശംസിച്ച അദ്ദേഹം, ഐക്യരാഷ്ട്രസഭയിൽ അമേരിക്കൻ അനുകൂല പ്രമേയങ്ങളെ എതിർത്തതിന് ചൈനയോട് നന്ദി അറിയിച്ചു.
ഹോർമുസ് കടലിടുക്കിലെ കപ്പൽ ഗതാഗതവുമായി ബന്ധപ്പെട്ട് ഒമാനുമായി ഒപ്പുവെക്കാൻ പോകുന്ന ധാരണകൾ അമേരിക്കയുമായുള്ള തർക്കങ്ങളിൽ നിന്നും പൂർണ്ണമായും സ്വതന്ത്രമാണെന്നും അദ്ദേഹം ചൂണ്ടിക്കാട്ടി. എങ്കിലും, മേഖലയിലെ കടൽമാർഗ്ഗങ്ങളിൽ ഇപ്പോഴും സൈനിക നടപടികൾ തുടരുന്നതിനാൽ ഒമാനുമായുള്ള കരാർ ഉടൻ പ്രാബല്യത്തിൽ വരാൻ സാധ്യതയില്ലെന്നാണ് വിലയിരുത്തൽ. ഇതിനിടെ ചെങ്കടലിലും ഹോർമുസ് കടലിടുക്കിലും ആക്രമണങ്ങൾ രൂക്ഷമായി തുടരുകയാണ്. ചെങ്കടലിൽ ഈജിപ്ഷ്യൻ ഉടമസ്ഥതയിലുള്ള ചരക്കുകപ്പലിന് നേരെ യമനിലെ ഹൂതികൾ നടത്തിയ ആക്രമണത്തിൽ ആറ് പേർ കൊല്ലപ്പെട്ടു.
അതേസമയം, ഇറാന്റെ ദക്ഷിണ തുറമുഖങ്ങളിലേക്കുള്ള ഉപരോധം ശക്തമാക്കുന്നതിന്റെ ഭാഗമായി പനാമ പതാക വഹിച്ച കപ്പലിന് നേരെ യു.എസ് നാവികസേനയുടെ ഹെലികോപ്റ്റർ രണ്ട് ഹെൽഫയർ മിസൈലുകൾ തൊടുത്തുവിട്ടു. കഴിഞ്ഞ ജൂണിൽ ഒപ്പുവെച്ച താൽക്കാലിക ധാരണാപത്രം ലംഘിക്കപ്പെടുകയും ഉപരോധം പുനരാരംഭിക്കുകയും ചെയ്തതിന് ശേഷം യു.എസ് നടത്തുന്ന മൂന്നാമത്തെ കപ്പൽ ആക്രമണമാണിത്. സംഘർഷം അവസാനിപ്പിക്കാൻ പാകിസ്താനും ഖത്തറും മധ്യസ്ഥ ശ്രമങ്ങൾ തുടരുന്നുണ്ടെങ്കിലും ടെഹ്റാനിൽ നിന്നുള്ള സൈനിക മുന്നറിയിപ്പുകൾ കൂടുതൽ ശക്തമായിക്കൊണ്ടിരിക്കുകയാണ്. യു.എസ് പ്രസിഡന്റ് ഡൊണാൾഡ് ട്രംപിന്റെ ഭാഗത്തുനിന്നുള്ള ഭീഷണികളെ ഗൗരവമായി കാണുന്നുവെന്ന് ഐ.ആർ.ജി.സി വ്യക്തമാക്കി.
ഇറാന്റെ ഊർജ്ജ നിലയങ്ങളെയോ സാധാരണക്കാരുടെ അടിസ്ഥാന സൗകര്യങ്ങളെയോ അമേരിക്ക ആക്രമിച്ചാൽ, മേഖലയിലെ ലക്ഷക്കണക്കിന് മൈൽ ഊർജ്ജ പൈപ്പ് ലൈനുകളും ആയിരക്കണക്കിന് വൈദ്യുതി നിലയങ്ങളും ആഗോള ഇന്റർനെറ്റ് അധിഷ്ഠിത നെറ്റ്വർക്കുകളും തിരിച്ചടി നേരിടുമെന്ന് ഐ.ആർ.ജി.സി വക്താവ് ഹുസൈൻ മൊഹെബ്ബി മുന്നറിയിപ്പ് നൽകി. നിലവിൽ പേർഷ്യൻ ഉൾക്കടലിൽ ഒരു അമേരിക്കൻ യുദ്ധക്കപ്പൽ പോലും ഇല്ലെന്നും, യു.എസിന്റെ മിസൈൽ ശേഖരത്തിൽ വൻ കുറവുണ്ടായിട്ടുണ്ടെന്നും ഇറാന്റെ മുതിർന്ന സൈനിക ഉപദേഷ്ടാവ് മുഹമ്മദ് റെസ നഖ്ദി പറഞ്ഞു. എത്ര വർഷം യുദ്ധം നീണ്ടാലും പ്രത്യാക്രമണം നടത്താൻ തക്കവണ്ണം തദ്ദേശീയമായി ബാലിസ്റ്റിക് മിസൈലുകളും ഡ്രോണുകളും ഇറാൻ വൻതോതിൽ ഉൽപ്പാദിപ്പിക്കുന്നുണ്ടെന്നും അദ്ദേഹം അവകാശപ്പെട്ടു.
പ്രതിരോധ രംഗം ശക്തമാക്കുന്നതിന്റെ ഭാഗമായി ഇറാന്റെ പരമോന്നത നേതാവ് മുജ്തബ ഖുമൈനി ആറ് പ്രമുഖരെ സൈനിക നേതൃപദവികളിൽ നിയമിച്ചു. ഐ.ആർ.ജി.സിയുടെ സമാന്തര സേനയായ ബാസിജിന്റെ തലവനായി ഹുസൈൻ താബിനെയും സേനകളുടെ സംയുക്ത മേധാവിയായി അലി അബ്ദുള്ളാഹിയെയും നിയമിച്ചു. എന്നാൽ രാജ്യത്തിനുള്ളിലെ സാമ്പത്തിക ഞെരുക്കവും ജനങ്ങൾക്കിടയിലെ അമർഷവും മുതലെടുത്ത് വിപ്ലവത്തെ ആഭ്യന്തരമായി തകർക്കാനാണ് ശത്രുക്കൾ ശ്രമിക്കുന്നതെന്ന് പ്രസിഡന്റ് മസൂദ് പെസെഷ്കിയാൻ മുന്നറിയിപ്പ് നൽകി. അതേസമയം യുദ്ധവും അനിശ്ചിതത്വവും മൂലം രാജ്യം കടുത്ത പ്രതിസന്ധിയിലൂടെയാണ് കടന്നുപോകുന്നതെന്നും ഭാവി അനിശ്ചിതത്വത്തിലാണെന്നും തലസ്ഥാനമായ ടെഹ്റാനിലെ സാധാരണ ജനങ്ങൾ പ്രതികരിക്കുന്നു.
