ഭോപ്പാൽ: മധ്യപ്രദേശിലെ സാഗർ ജില്ലയിൽ വ്യാജമദ്യം കഴിച്ച് ഒൻപത് പേർ മരിച്ചു. ശാരീരിക അസ്വസ്ഥതകളെ തുടർന്ന് നിരവധി പേർ വിവിധ ആശുപത്രികളിൽ ചികിത്സയിലാണ്. ഇവരിൽ ആറുപേരുടെ നില നിലവിൽ അതീവ ഗുരുതരമായി തുടരുന്നതായാണ് വിവരം.
ശനിയാഴ്ച രാത്രിയോടെയാണ് സംഭവം നടന്നത്. മദ്യം കഴിച്ചതിന് പിന്നാലെ ആളുകൾക്ക് കഠിനമായ തലവേദന, കാഴ്ചമങ്ങൽ, ശ്വാസതടസ്സം, ഛർദ്ദി എന്നീ ലക്ഷണങ്ങൾ അനുഭവപ്പെടാൻ തുടങ്ങുകയായിരുന്നു. തുടർന്ന് ഇവരെ ഉടൻതന്നെ ബണ്ട സിവിൽ ആശുപത്രിയിലും സാഗറിലെ ബുന്ദേൽഖണ്ഡ് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. എന്നാൽ ആശുപത്രിയിലെത്തിക്കുന്നതിന് മുൻപും ചികിത്സയിലിരിക്കെയുമായി ഒൻപത് പേർ മരണപ്പെടുകയായിരുന്നു.
സംഭവത്തെ തുടർന്ന് ജില്ലാ ഭരണകൂടം ഉടൻതന്നെ അന്വേഷണം ആരംഭിച്ചിട്ടുണ്ട്. ദുരന്തത്തിന് കാരണമായ വ്യാജമദ്യത്തിന്റെ ഉറവിടം കണ്ടെത്തുന്നതിനും കുറ്റക്കാർക്കെതിരെ നടപടിയെടുക്കുന്നതിനുമായി മജിസ്ട്രേറ്റ് തല അന്വേഷണത്തിന് ഉത്തരവിട്ടതായി അധികൃതർ അറിയിച്ചു.
