മുംബൈ: ഐ.ഐ.ടി ബോംബെയിൽ മരിച്ച വിദ്യാർത്ഥി സാഹിൽ വാകോഡെയുടെ മരണത്തിൽ ദുരൂഹതയുണ്ടെന്ന് ആരോപിച്ച് നീതി തേടി മാതാപിതാക്കൾ സമരം ശക്തമാക്കുന്നു. മകന്റെ മരണവുമായി ബന്ധപ്പെട്ട വിവരങ്ങൾ നേരിട്ടറിയാൻ ഐ.ഐ.ടി ക്യാമ്പസിൽ പലതവണ എത്താൻ ശ്രമിച്ചെങ്കിലും പോലീസ് പ്രവേശനം അനുവദിച്ചില്ലെന്ന് സാഹിലിന്റെ പിതാവ് രവീന്ദ്ര വാകോഡെ പറഞ്ഞു. ക്യാമ്പസിനുള്ളിൽ യഥാർത്ഥത്തിൽ എന്താണ് സംഭവിച്ചതെന്ന് അറിയണമെന്നും അന്വേഷണത്തിൽ സുതാര്യത വേണമെന്നും ആവശ്യപ്പെട്ട് തിങ്കളാഴ്ച മുതൽ മുംബൈയിലെ ആസാദ് മൈതാനിയിൽ നിരാഹാര സമരം ആരംഭിക്കുമെന്ന് കുടുംബം അറിയിച്ചതായി ദേശീയ മാധ്യമങ്ങൾ റിപ്പോർട്ട് ചെയ്തു.
മകന്റെ മരണവുമായി ബന്ധപ്പെട്ട തെളിവുകൾ കൈവശമുള്ള വിദ്യാർത്ഥികൾ അവ സംരക്ഷിക്കണമെന്നും ഭാവിയിൽ അന്വേഷണത്തിനും കോടതി നടപടികൾക്കും ഇത് ആവശ്യമായി വരുമെന്നും പിതാവ് വിദ്യാർത്ഥികളോട് അഭ്യർത്ഥിച്ചു. ദളിത് വിദ്യാർത്ഥിയായ സാഹിലിന് ക്യാമ്പസിൽ കടുത്ത ജാതി വിവേചനം നേരിടേണ്ടി വന്നിരുന്നുവെന്നാണ് കുടുംബത്തിന്റെ പ്രധാന ആരോപണം.
അതേസമയം, സാഹിലിന്റെ മരണത്തിൽ ദുരൂഹതയുണ്ടെന്ന് ആരോപിച്ച് ഐ.ഐ.ടി ക്യാമ്പസിലും വിദ്യാർത്ഥി പ്രതിഷേധം ശക്തമായി തുടരുകയാണ്. വെള്ളിയാഴ്ച രാത്രി വിദ്യാർത്ഥികൾ ക്യാമ്പസിൽ മെഴുകുതിരി റാലി സംഘടിപ്പിച്ചു. ഐ.ഐ.ടി ബോംബെ നിയമിച്ച നിലവിലെ അന്വേഷണ സമിതിയെ പിരിച്ചുവിട്ട് ക്യാമ്പസുമായി ബന്ധമില്ലാത്ത പുറത്തുനിന്നുള്ള അംഗങ്ങളെ ഉൾപ്പെടുത്തിക്കൊണ്ട് സ്വതന്ത്രവും നിഷ്പക്ഷവുമായ സമിതി രൂപീകരിക്കണമെന്നാണ് വിദ്യാർത്ഥികളുടെ പ്രധാന ആവശ്യം. കൂടാതെ, വിദ്യാർത്ഥി ക്ഷേമ സംവിധാനങ്ങളിലും അച്ചടക്ക നടപടികളിലും കൂടുതൽ സുതാര്യത ഉറപ്പാക്കണമെന്നും വിദ്യാർത്ഥികൾ ആവശ്യപ്പെട്ടിട്ടുണ്ട്.
സംഭവത്തിൽ വിദ്യാർത്ഥിയെ മാനസികമായി പീഡിപ്പിച്ചെന്ന് ആരോപിക്കപ്പെടുന്ന അധ്യാപകനായ ദുല്ലയ്ക്കെതിരെ പോലീസ് ഇതിനോടകം കേസ് രജിസ്റ്റർ ചെയ്തിട്ടുണ്ട്. അന്വേഷണം പൂർത്തിയാകുന്നതുവരെ ആരോപണവിധേയനായ ഈ അധ്യാപകനെ ചുമതലകളിൽ നിന്ന് മാറ്റിനിർത്തണമെന്ന ആവശ്യവും ശക്തമായി ഉയർന്നിട്ടുണ്ട്. സംഭവത്തിൽ മുംബൈ ക്രൈംബ്രാഞ്ചും ഐ.ഐ.ടി നിയോഗിച്ച സമിതിയും അന്വേഷണം ഊർജ്ജിതമാക്കിയിട്ടുണ്ട്.
