ജമ്മു: ജമ്മു കശ്മീരിലെ കത്വ ജില്ലയിൽ സഹപ്രവർത്തകന്റെ വെടിയേറ്റ് അസിസ്റ്റന്റ് കമാൻഡന്റ് ഉൾപ്പെടെ നാല് കേന്ദ്ര വ്യാവസായിക സുരക്ഷാ സേന (സി.ഐ.എസ്.എഫ്) ജവാൻമാർ കൊല്ലപ്പെട്ടു. സംഭവത്തിൽ പ്രതിയായ ഹെഡ് കോൺസ്റ്റബിൾ അഭിദേഷ് കുമാറിനെ സഹപ്രവർത്തകർ കീഴടക്കി പോലീസിന് കൈമാറി. ചൊവ്വാഴ്ച വൈകിട്ട് 7.30 ഓടെ ഹിമാചൽ പ്രദേശ് അതിർത്തിക്ക് സമീപമുള്ള ബസോഹ്ലിയിലെ മാഷ്ക ഗ്രാമത്തിലെ സേവ-3 ജലവൈദ്യുത പദ്ധതി ക്യാമ്പിലാണ് നാടിനെ നടുക്കിയ ഈ സംഭവം നടന്നത്.
സഹപ്രവർത്തകരുമായുണ്ടായ കടുത്ത തർക്കത്തിനൊടുവിൽ പ്രകോപിതനായ അഭിദേഷ് കുമാർ തൻ്റെ സർവീസ് റൈഫിൾ ഉപയോഗിച്ച് അവർക്ക് നേരെ വെടിയുതിർക്കുകയായിരുന്നു. അസിസ്റ്റന്റ് കമാൻഡന്റ് അങ്കിത് കുമാർ പാണ്ഡെ, സബ് ഇൻസ്പെക്ടർ ലക്ഷ്മൺ സിങ്, കോൺസ്റ്റബിൾമാരായ റഫീഖ് അഹമ്മദ്, സന്ദീപ് കുമാർ എന്നിവരാണ് മരിച്ചത്. വെടിയേറ്റ് ഗുരുതരമായി പരിക്കേറ്റ നാലുപേരെയും ഉടൻ തന്നെ സമീപത്തെ എൻ.എച്ച്.പി.സി (NHPC) ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണപ്പെടുകയായിരുന്നു.
വെടിവെപ്പിന് പിന്നാലെ ക്യാമ്പിലുണ്ടായിരുന്ന മറ്റ് ഉദ്യോഗസ്ഥർ ഇടപെട്ടാണ് പ്രതിയെ കീഴടക്കിയത്. കുറ്റകൃത്യത്തിന് ഉപയോഗിച്ച സർവീസ് റൈഫിൾ പോലീസ് പിടിച്ചെടുത്തിട്ടുണ്ട്. സംഭവത്തെ തുടർന്ന് സി.ഐ.എസ്.എഫിലെയും ജമ്മു കശ്മീർ പോലീസിലെയും ഉന്നത ഉദ്യോഗസ്ഥർ സ്ഥലത്തെത്തി സ്ഥിതിഗതികൾ വിലയിരുത്തി. കൊലപാതകത്തിലേക്ക് നയിച്ച തർക്കത്തിന്റെ കാരണം കണ്ടെത്താൻ സൈന്യവും പോലീസും അന്വേഷണം ഊർജ്ജിതമാക്കിയിട്ടുണ്ട്.
