മ്യൂണിക്: ജർമനിയിലെ മ്യൂണിക്കിലുണ്ടായ അപ്രതീക്ഷിത തീപിടിത്തത്തിൽ അപ്പാർട്ട്‌മെന്റിനുള്ളിൽ അകപ്പെട്ട് മലയാളി യുവതിക്ക് ദാരുണാന്ത്യം. ഇടുക്കി ശാന്തിഗ്രാം സ്വദേശി സാബുവിന്റെ മകൾ നോവ സാബു (25) ആണ് മരിച്ചത്. തൊഴിൽ ആവശ്യങ്ങൾക്കായി ആറ് മാസം മുമ്പാണ് നോവ ജർമനിയിലേക്ക് പോയത്. മ്യൂണിക്കിൽ ഇവർ താമസിച്ചിരുന്ന അപ്പാർട്ട്‌മെന്റ് കെട്ടിടത്തിൽ പെട്ടെന്നുണ്ടായ തീപിടിത്തത്തിൽ പുക ശ്വസിച്ചും പൊള്ളലേറ്റുമാണ് അപകടമെന്നാണ് പ്രാഥമിക വിവരങ്ങൾ.
സംഭവം നടക്കുമ്പോൾ അപ്പാർട്ട്‌മെന്റിൽ ആളുകൾ കുടുങ്ങിപ്പോവുകയായിരുന്നു. വിവരമറിഞ്ഞ് സ്ഥലത്തെത്തിയ ജർമൻ അഗ്നിശമന സേന ഉടൻ തന്നെ രക്ഷാപ്രവർത്തനം ആരംഭിച്ചെങ്കിലും നോവയുടെ ജീവൻ രക്ഷിക്കാനായില്ല. അപകടത്തിന്റെ കൃത്യമായ കാരണവും തീപിടിത്തത്തിലേക്ക് നയിച്ച സാഹചര്യവും സംബന്ധിച്ച് ജർമൻ പൊലീസും പ്രാദേശിക അന്വേഷണ ഏജൻസികളും അന്വേഷണം ആരംഭിച്ചിട്ടുണ്ട്.
