ന്യൂഡൽഹി: പ്രതിപക്ഷം ദേശവിരുദ്ധരാണെന്ന ഭരണപക്ഷ ആരോപണങ്ങളിൽ പ്രധാനമന്ത്രി നരേന്ദ്ര മോദിയെ വീണ്ടും പരസ്യ സംവാദത്തിന് വെല്ലുവിളിച്ച് പ്രതിപക്ഷ നേതാവ് രാഹുൽ ഗാന്ധി. ഇന്ത്യ-യു.എസ് വ്യാപാര കരാർ, അദാനി വിഷയം, എപ്സ്റ്റീൻ ഫയലുകൾ, വിദേശബന്ധങ്ങൾ എന്നിവയിൽ പ്രധാനമന്ത്രിയോട് പരസ്യമായി ഏറ്റുമുട്ടാൻ തയ്യാറാണെന്ന് വ്യക്തമാക്കി രാഹുൽ ഗാന്ധി സോഷ്യൽ മീഡിയയിൽ പുതിയ വീഡിയോ പങ്കുവെച്ചു. തന്റെ ആദ്യ വെല്ലുവിളിക്ക് 24 മണിക്കൂർ തികഞ്ഞുവെന്നും, ധൈര്യമുണ്ടെങ്കിൽ സംവാദത്തിനുള്ള സ്ഥലം പ്രധാനമന്ത്രിക്ക് തന്നെ തീരുമാനിക്കാമെന്നും അദ്ദേഹം കൂട്ടിച്ചേർത്തു.
ആരാണ് യഥാർത്ഥ ദേശദ്രോഹിയെന്നും ആർക്കാണ് വഴിവിട്ട വിദേശബന്ധങ്ങളുള്ളതെന്നും ജനങ്ങൾ തീരുമാനിക്കട്ടെ എന്ന് രാഹുൽ തുറന്നടിച്ചു. മാധ്യമങ്ങളുടെയും രാജ്യത്തെ യുവാക്കളുടെയും സാന്നിധ്യത്തിൽ ഒരു മേശയുടെ ഇരുവശത്തുമിരുന്ന് തർക്കവിഷയങ്ങൾ ചർച്ച ചെയ്യാം. പ്രധാനമന്ത്രിക്ക് സംവാദത്തിൽ വിശ്വാസമില്ലെങ്കിൽ മോഹൻ ഭാഗവതിനെ തന്നെ അധ്യക്ഷനാക്കാമെന്നും രാഹുൽ പരിഹസിച്ചു. ഇന്ത്യ-യു.എസ് ഡീൽ മന്ത്രിസഭയിൽ ചർച്ച ചെയ്യാതെ തിടുക്കത്തിൽ ഒപ്പുവെച്ചതും, അദാനി കേസിലെ ദുരൂഹതകളും തുറന്നുപറയാൻ പ്രധാനമന്ത്രിക്ക് ബാധ്യതയുണ്ടെന്നും അദ്ദേഹം ഓർമ്മിപ്പിച്ചു.
തനിക്കെതിരെ രാജ്യത്താകെ 45-ഓളം അപകീർത്തി കേസുകളുണ്ടെന്നും എന്നാൽ വിദേശബന്ധ ആരോപണങ്ങളിൽ ഭരണപക്ഷം ഇതുവരെ കേസ് നൽകിയിട്ടില്ലെന്നും രാഹുൽ ചൂണ്ടിക്കാട്ടി. ഇത്തരം ആരോപണങ്ങളിൽ കോടതിയിലോ പരസ്യവേദിയിലോ മറുപടി നൽകാൻ താൻ സജ്ജനാണെന്നും പ്രധാനമന്ത്രിക്ക് ദീപാവലി ആശംസകൾ നേർന്നുകൊണ്ട് രാഹുൽ വ്യക്തമാക്കി.
