തിരുവനന്തപുരം: പി.എസ്.സി പരീക്ഷാക്രമക്കേടുകളുമായി ബന്ധപ്പെട്ട അന്വേഷണത്തിൽ ചെയർമാൻ എം.ആർ. ബൈജുവിനെതിരായ തെളിവുകൾ ശക്തമാക്കി ക്രൈംബ്രാഞ്ച് പ്രത്യേക അന്വേഷണ സംഘം (എസ്.ഐ.ടി). നിലവിൽ കേസിൽ അറസ്റ്റിലായ പി.എസ്.സി അഡീഷണൽ സെക്രട്ടറി ആർ. ഹരി, മുൻ ഡെപ്യൂട്ടി സെക്രട്ടറി പി. സതീഷ് എന്നിവർക്കൊപ്പം ചെയർമാനെ ഇരുത്തി ചോദ്യം ചെയ്യാനാണ് അന്വേഷണസംഘത്തിന്റെ നീക്കം. ലഭിച്ച രേഖകളുടെയും മൊഴികളുടെയും അടിസ്ഥാനത്തിൽ നിയമോപദേശം തേടിയ ശേഷം, നിലവിൽ രജിസ്റ്റർ ചെയ്ത നാല് കേസുകളിലും എം.ആർ. ബൈജുവിനെ പ്രതിചേർക്കാനുള്ള സാധ്യതകൾ എസ്.ഐ.ടി ആരായുന്നുണ്ട്.
അറസ്റ്റിലായ ഉദ്യോഗസ്ഥരെ കഴിഞ്ഞ ദിവസങ്ങളിൽ കസ്റ്റഡിയിൽ വാങ്ങി ചോദ്യം ചെയ്തപ്പോൾ പരസ്പരം പഴിചാരുന്നതിനൊപ്പം ഉന്നതരുടെയും മറ്റ് ഉദ്യോഗസ്ഥരുടെയും പങ്ക് വ്യക്തമാക്കുന്ന വിവരങ്ങൾ പുറത്തുവന്നിട്ടുണ്ട്. രണ്ട് പ്രതികളെയും വീണ്ടും കസ്റ്റഡിയിൽ വാങ്ങി ഒരുമിച്ചിരുത്തി ചോദ്യം ചെയ്യുന്ന ഘട്ടത്തിലാകും ചെയർമാനെയും ഇതിലേക്ക് വിളിച്ചുവരുത്തുക. പി.എസ്.സി ചെയർമാൻ എന്ന നിലയിലുള്ള എം.ആർ. ബൈജുവിന്റെ ഏകപക്ഷീയമായ തീരുമാനങ്ങളാണ് ക്രമക്കേടുകൾക്ക് വഴിവെച്ചതെന്നാണ് ക്രൈംബ്രാഞ്ചിന്റെ പ്രാഥമിക നിഗമനം. ചോദ്യപേപ്പർ തയ്യാറാക്കുന്ന പാനലിനെയും മൂല്യനിർണയം നടത്തുന്നവരെയും ചെയർമാൻ തനിച്ചാണ് തീരുമാനിച്ചിരുന്നതെന്ന് ഭരണസമിതി അംഗങ്ങളും, സ്വന്തം ഇഷ്ടപ്രകാരമാണ് ഭരണപരമായ കാര്യങ്ങളിൽ ചെയർമാൻ നിലപാടെടുത്തിരുന്നതെന്ന് പി.എസ്.സി സെക്രട്ടറിയും മൊഴി നൽകിയിട്ടുണ്ട്.
വിവിധ നിയമനങ്ങളിൽ നടന്ന രാഷ്ട്രീയ ഇടപെടലുകൾക്ക് പുറമെ, അഡീഷണൽ സെക്രട്ടറി ഹരിയും ചെയർമാൻ ബൈജുവും ചേർന്നാണ് ക്രമക്കേടുകൾക്ക് വഴിയൊരുക്കിയ നിർണായക തീരുമാനങ്ങൾ എടുത്തതെന്ന തെളിവുകളും അന്വേഷണ സംഘത്തിന് ലഭിച്ചു. കൂടാതെ, പി.എസ്.സിയുമായി ബന്ധപ്പെട്ട് പൊതുജനങ്ങളിൽ നിന്നും ഉദ്യോഗാർത്ഥികളിൽ നിന്നും എസ്.ഐ.ടിക്ക് ലഭിച്ച 180-ലധികം പരാതികളിൽ ഭൂരിഭാഗവും ചെയർമാന്റെ ദുരൂഹമായ ഇടപെടലുകളെ ചൂണ്ടിക്കാണിക്കുന്നതാണ്. മൊഴികളിലെ വൈരുധ്യം പരിഹരിക്കുന്നതിനും കൂടുതൽ വിവരങ്ങൾ ശേഖരിക്കുന്നതിനുമായി വരുംദിവസങ്ങളിൽ ചെയർമാനെ ചോദ്യം ചെയ്യുന്നതോടെ കേസിലെ മറ്റ് ഉന്നതരുടെ പങ്കും പുറത്തുവരുമെന്നാണ് സൂചന.
