സംഗ്രൂർ: പാർലമെന്റിൽ അംഗമായിരുന്ന കാലത്ത് പഞ്ചാബ് മുഖ്യമന്ത്രി ഭഗവന്ത് മൻ മദ്യപിച്ച് രൂക്ഷമായ ദുർഗന്ധത്തോടെയാണ് സഭയിലെത്തിയിരുന്നതെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. പഞ്ചാബിലെ സംഗ്രൂരിൽ സംഘടിപ്പിച്ച ‘ഇൻസാഫ് റാലി’യിൽ സംസാരിക്കവേയാണ് മന്നിനെതിരെ വ്യക്തിപരമായ രൂക്ഷവിമർശനങ്ങളുമായി രാഹുൽ രംഗത്തെത്തിയത്. സംസ്ഥാനത്ത് മാരകമായി പടരുന്ന ലഹരിവിപത്ത് തടയുന്നതിൽ മുഖ്യമന്ത്രി എത്രത്തോളം ആത്മാർത്ഥത പുലർത്തുന്നുണ്ടെന്ന് രാഹുൽ ഗാന്ധി പരസ്യമായി ചോദ്യം ചെയ്തു.
മുമ്പ് ലോക്‌സഭയിൽ ഒപ്പമിരുന്ന കാലത്ത് രാവിലെ 11 മണിക്ക് തന്നെ ഭഗവന്ത് മന്നിൽ നിന്ന് കടുത്ത മദ്യത്തിന്റെ മണം വരുമായിരുന്നുവെന്ന് രാഹുൽ ഓർത്തെടുത്തു. ഒരാളുടെ മദ്യപാനം വ്യക്തിപരമായ കാര്യമാണെങ്കിലും, നിരന്തരം ലഹരിയിൽ മുഴുകുന്ന ഒരു മുഖ്യമന്ത്രിക്ക് സംസ്ഥാനത്തെ ലഹരിവിപത്തിനെതിരെ എങ്ങനെ വിട്ടുവീഴ്ചയില്ലാതെ പോരാടാനാകുമെന്ന് അദ്ദേഹം ചോദിച്ചു. ആം ആദ്മി പാർട്ടി ഭരണത്തിൻ കീഴിൽ ലഹരി വ്യാപനം തടയുന്നതിൽ സർക്കാർ ദയനീയമായി പരാജയപ്പെട്ടെന്നും, പഞ്ചാബിന്റെ ഭരണം ഡൽഹിയിൽ നിന്നാണ് റിമോട്ട് കൺട്രോൾ ചെയ്യുന്നതെന്നും രാഹുൽ കുറ്റപ്പെടുത്തി.
തൊഴിലില്ലായ്മയും സാമ്പത്തിക തകർച്ചയുമാണ് പഞ്ചാബിലെ യുവാക്കളെ ലഹരിയിലേക്കും ഗുണ്ടാസംഘങ്ങളിലേക്കും നയിക്കുന്നതെന്ന് ചൂണ്ടിക്കാട്ടിയ രാഹുൽ, കോൺഗ്രസ് അധികാരത്തിൽ വന്നാൽ സംസ്ഥാനത്തിന്റെ സമ്പദ്‌വ്യവസ്ഥയെ വീണ്ടെടുക്കുമെന്ന് ഉറപ്പുനൽകി. റാലിയിൽ പങ്കെടുത്ത കൊല്ലപ്പെട്ട ഗായകൻ സിദ്ധു മൂസെവാലയുടെ പിതാവ് ബൽക്കൗർ സിങ്ങിനെ രാഹുൽ വേദിയിലേക്ക് സ്വാഗതം ചെയ്തു. മുൻ മുഖ്യമന്ത്രി ചരൺജിത് സിങ് ഛന്നി, പഞ്ചാബ് കോൺഗ്രസ് അധ്യക്ഷൻ പർഗട്ട് സിങ് തുടങ്ങിയ പ്രമുഖ നേതാക്കളും റാലിയിൽ സംസ്ഥാന സർക്കാരിനെതിരെ രൂക്ഷമായ വിമർശനങ്ങൾ ഉന്നയിച്ചു.
