മക്ക ക്ലോക്ക് ടവറിന് ഇരട്ട ഗിന്നസ് റെക്കോർഡ്; ലോകത്തിലെ ഏറ്റവും ഉയരത്തിലുള്ള മ്യൂസിയവും നിരീക്ഷണ കേന്ദ്രവും ഇനി മക്കയിൽ

ജിദ്ദ: മക്കയിലെ പ്രശസ്തമായ ക്ലോക്ക് ടവറിന് രണ്ട് പുതിയ ഗിന്നസ് വേൾഡ് റെക്കോർഡ് സർട്ടിഫിക്കറ്റുകൾ ലഭിച്ചു. ഒരു കെട്ടിടത്തിനുള്ളിലെ ലോകത്തിലെ ഏറ്റവും ഉയരത്തിലുള്ള മ്യൂസിയം, ലോകത്തിലെ ഏറ്റവും ഉയരത്തിലുള്ള തുറന്ന നിരീക്ഷണ കേന്ദ്രം എന്നീ നേട്ടങ്ങൾക്കാണ് മക്ക സിറ്റി ആൻഡ് ഹോളി സൈറ്റ്സ് റോയൽ കമ്മീഷൻ ഈ അംഗീകാരങ്ങൾ ഏറ്റുവാങ്ങിയത്.

ജനുവരി 5-നാണ് രണ്ട് റെക്കോർഡുകളും ഔദ്യോഗികമായി രേഖപ്പെടുത്തിയതെന്ന് ഗിന്നസ് അധികൃതർ വ്യക്തമാക്കി. ഭൂനിരപ്പിൽ നിന്ന് 426.875 മീറ്റർ ഉയരത്തിലാണ് ക്ലോക്ക് ടവർ മ്യൂസിയം സ്ഥിതി ചെയ്യുന്നത്. 560.875 മീറ്റർ ഉയരത്തിലാണ് തുറന്ന നിരീക്ഷണ കേന്ദ്രമുള്ളത്. വിശുദ്ധ ഹറം പള്ളിയുടെയും മക്ക നഗരത്തിന്റെയും മനോഹരമായ വിഹംഗവീക്ഷണം ഈ നിരീക്ഷണ കേന്ദ്രത്തിൽ നിന്ന് സാധ്യമാകും.

2019 മെയ് മാസത്തിൽ സന്ദർശകർക്കായി തുറന്നുകൊടുത്ത മ്യൂസിയം ടവറിന്റെ ഏറ്റവും മുകളിലത്തെ നാല് നിലകളിലായാണ് പ്രവർത്തിക്കുന്നത്. ജ്യോതിശാസ്ത്രം, സമയനിർണ്ണയം, മക്കയുടെ ചരിത്രം, ക്ലോക്കിന്റെ നിർമ്മാണത്തിന് പിന്നിലെ എൻജിനീയറിങ് വൈദഗ്ധ്യം എന്നിവയെക്കുറിച്ചുള്ള വിപുലമായ പ്രദർശനങ്ങളാണ് ഇവിടെയുള്ളത്. ജ്യോതിശാസ്ത്ര ഉപകരണങ്ങളുടെ പരിണാമത്തെക്കുറിച്ചും ഇസ്ലാമിക കലണ്ടറിലെ മാസപ്പിറവി നിരീക്ഷിക്കുന്ന രീതികളെക്കുറിച്ചും സന്ദർശകർക്ക് ഇവിടെനിന്ന് അറിവ് നേടാനാകും.

ഭൂനിരപ്പിൽ നിന്ന് മില്ലിമീറ്റർ കൃത്യതയോടെയാണ് ഗിന്നസ് അധികൃതർ മ്യൂസിയത്തിന്റെ ഉയരം അളന്നത്. പൊതുജനങ്ങളുടെ വിദ്യാഭ്യാസത്തിനും സാംസ്കാരിക ഉന്നമനത്തിനുമായി ചരിത്രവസ്തുക്കളും ശേഖരങ്ങളും സംരക്ഷിക്കുകയും പ്രദർശിപ്പിക്കുകയും ചെയ്യുന്ന ഇടം എന്ന നിർവചനത്തിന്റെ അടിസ്ഥാനത്തിലാണ് ഈ റെക്കോർഡ് അനുവദിച്ചത്.

മസ്ജിദുൽ ഹറമിന് സമീപമുള്ള ഏഴ് ടവറുകൾ അടങ്ങുന്ന അബ്രാജ് അൽ-ബൈത്ത് സമുച്ചയത്തിന്റെ ഭാഗമായ 601 മീറ്റർ ഉയരമുള്ള ഈ ടവർ 2012-ലാണ് നിർമ്മാണം പൂർത്തിയാക്കിയത്. സൗദി ബിൻലാദിൻ ഗ്രൂപ്പാണ് സമുച്ചയം നിർമ്മിച്ചത്. ക്ലോക്കിന് മുകളിലുള്ള 71 മീറ്റർ ഉയരമുള്ള സ്തൂപം (Spire) കൂടിയാകുമ്പോഴാണ് കെട്ടിടം അതിന്റെ പൂർണ്ണ ഉയരത്തിലെത്തുന്നത്.

ടവറിന്റെ നാല് വശങ്ങളിലുമുള്ള ക്ലോക്ക് മുഖങ്ങൾക്ക് 43 മീറ്റർ വീതം വ്യാസമുണ്ട്; ലണ്ടനിലെ എലിസബത്ത് ടവറിലുള്ളതിനേക്കാൾ ഏകദേശം ആറിരട്ടി വലിപ്പമാണിത്. ക്ലോക്ക് മുഖത്തിന്റെ വലിപ്പത്തിനുള്ള ഗിന്നസ് റെക്കോർഡ് 2011 നവംബർ 28-ന് ടവറിന് ലഭിച്ചിരുന്നു. പുതിയ രണ്ട് അംഗീകാരങ്ങൾ കൂടി എത്തിയതോടെ മക്ക ക്ലോക്ക് ടവറിന്റെ ഗിന്നസ് നേട്ടങ്ങളുടെ എണ്ണം കുറഞ്ഞത് അഞ്ചായി ഉയർന്നു. ലോകത്തിലെ ഏറ്റവും ഉയരമുള്ള ക്ലോക്ക് ടവർ, ഏറ്റവും വലിയ ക്ലോക്ക് മുഖം, ഏറ്റവും ഉയരത്തിലുള്ള ക്ലോക്ക് മുഖം എന്നിവയാണ് മുൻപ് ലഭിച്ച റെക്കോർഡുകൾ.

മക്കയിലെ ചരിത്രപരമായ അടയാളങ്ങൾ വികസിപ്പിക്കുന്നതിനും താമസക്കാർക്കും തീർത്ഥാടകർക്കും സന്ദർശകർക്കുമുള്ള സൗകര്യങ്ങൾ മെച്ചപ്പെടുത്തുന്നതിനും കമ്മീഷൻ നടത്തുന്ന ശ്രമങ്ങളുടെ പ്രതിഫലനമാണ് ഈ നേട്ടമെന്ന് റോയൽ കമ്മീഷൻ വ്യക്തമാക്കി. നഗരത്തിന്റെ ചരിത്രപരവും ശാസ്ത്രീയവും വാസ്തുവിദ്യാപരവുമായ സവിശേഷതകൾ പ്രയോജനപ്പെടുത്തി, മക്കയിലെ നിർമ്മിതികളുടെ അന്താരാഷ്ട്ര പ്രശസ്തി വർദ്ധിപ്പിക്കാനുള്ള വിപുലമായ പദ്ധതികളുടെ ഭാഗമാണിത്.

Related Articles

- Advertisement -spot_img

Latest Articles