കൊച്ചി: സംസ്ഥാനത്ത് സ്വർണ്ണവിലയിൽ ഇന്നും വൻ ഇടിവ് രേഖപ്പെടുത്തി. 2025 ഡിസംബർ ആദ്യവാരത്തിലെ വില നിലവാരത്തിലേക്കാണ് വിപണി കൂപ്പുകുത്തിയത്. ഇന്ന് പവന് ഒറ്റയടിക്ക് 2,040 രൂപയും ഗ്രാമിന് 255 രൂപയുമാണ് കുറഞ്ഞത്. ഇതോടെ ഒരു പവൻ സ്വർണ്ണത്തിന്റെ വില 97,720 രൂപയായും ഒരു ഗ്രാമിന് 12,215 രൂപയായും താഴ്ന്നു. നേരത്തെ 2025 ഡിസംബർ 12-നായിരുന്നു പവൻ വില 97,680 രൂപ എന്ന ഈ നിലവാരത്തിലുണ്ടായിരുന്നത്.
അന്താരാഷ്ട്ര വിപണിയിലും സ്വർണ്ണവിലയിൽ കനത്ത ഇടിവാണ് നേരിട്ടത്. സ്പോട്ട് ഗോൾഡ് ട്രോയ് ഔൺസിന് 61.02 ഡോളർ (1.59 ശതമാനം) കുറഞ്ഞ് 3,788.64 ഡോളറിലെത്തി. ഈ വർഷം ജനുവരി 29-ന് പവന് 1,31,160 രൂപ എന്ന റെക്കോർഡ് നിരക്കിലുണ്ടായിരുന്ന സ്വർണ്ണത്തിന് പത്ത് മാസത്തിനിടെ 33,440 രൂപയുടെ കുറവാണ് രേഖപ്പെടുത്തിയത്. സ്വർണ്ണത്തിന് പിന്നാലെ വെള്ളിവിലയിലും ഇടിവുണ്ടായി; ഗ്രാമിന് അഞ്ച് രൂപ കുറഞ്ഞ് 185 രൂപയാണ് ഇന്നത്തെ വെള്ളിവില.
ഏറെ നാളത്തെ ഇടവേളയ്ക്ക് ശേഷം ചൊവ്വാഴ്ചയാണ് സ്വർണ്ണവില ഒരു ലക്ഷത്തിന് താഴേക്ക് പതിച്ചത്. ചൊവ്വാഴ്ച പവന് 560 രൂപ കുറഞ്ഞ് 99,760 രൂപയായും, തിങ്കളാഴ്ച 600 രൂപ കുറഞ്ഞ് 1,00,320 രൂപയായും വില താഴ്ന്നിരുന്നു. അമേരിക്കൻ ഡോളറിന്റെ മൂല്യം ശക്തിപ്പെടുന്നതും, പലിശനിരക്കുമായി ബന്ധപ്പെട്ട പ്രതീക്ഷകളും, നിക്ഷേപകരുടെ വൻതോതിലുള്ള ലാഭമെടുപ്പും, ആഗോള സാമ്പത്തിക സാഹചര്യങ്ങളിലെ മാറ്റങ്ങളുമാണ് സ്വർണ്ണവിലയിലെ ഈ വലിയ ഇടിവിന് പ്രധാന കാരണങ്ങളായി വിപണി വിദഗ്ധർ വിലയിരുത്തുന്നത്.



