റിയാദ്: വ്യാഴാഴ്ച പുലർച്ചെ റിയാദിന് നേരെ യെമനിലെ ഹൂതി വിമതർ തൊടുത്തുവിട്ട മിസൈൽ സൗദി നേതൃത്വത്തിലുള്ള സഖ്യസേന തകർത്തു. തലസ്ഥാന നഗരത്തിൽ ഉഗ്ര സ്ഫോടന ശബ്ദം കേട്ടതായും തകർക്കപ്പെട്ട മിസൈലിന്റെ അവശിഷ്ടങ്ങൾ പതിച്ചുണ്ടായ നാശനഷ്ടങ്ങൾ വിലയിരുത്തി വരികയാണെന്നും സഖ്യസേന അറിയിച്ചു.
പുലർച്ചെ 4:42-ന് വ്യോമാക്രമണ ഭീഷണി സംബന്ധിച്ച് സിവിൽ ഡിഫൻസ് മൊബൈൽ ഫോണുകളിലൂടെ ജാഗ്രതാ നിർദ്ദേശം നൽകിയിരുന്നു. ഏകദേശം മൂന്ന് മിനിറ്റിനുശേഷം നഗരത്തിൽ വലിയ സ്ഫോടന ശബ്ദം കേൾക്കുകയും, തൊട്ടുപിന്നാലെ അപകടഭീഷണി ഒഴിഞ്ഞതായുള്ള അറിയിപ്പ് താമസക്കാർക്ക് ലഭിക്കുകയും ചെയ്തു. പുലർച്ചെ 5:20-ഓടെയാണ് ഹൂതികളുടെ മിസൈൽ ഭീഷണി സൈന്യം നിർവീര്യമാക്കിയതായി സഖ്യസേനാ വക്താവ് മേജർ ജനറൽ തുർക്കി അൽ-മാലികി ‘എക്സ്’ പ്ലാറ്റ്ഫോമിലൂടെ സ്ഥിരീകരിച്ചത്.
സമീപ ആഴ്ചകളിൽ സൗദി അറേബ്യയിലെ നഗരങ്ങൾ, വിമാനത്താവളങ്ങൾ, തുറമുഖങ്ങൾ, എണ്ണ ഉൽപ്പാദന കേന്ദ്രങ്ങൾ എന്നിവ ലക്ഷ്യമിട്ട് ഇറാൻ പിന്തുണയുള്ള ഹൂതികൾ മിസൈൽ-ഡ്രോൺ ആക്രമണങ്ങൾ ശക്തമാക്കിയിട്ടുണ്ട്. കിംഗ് ഖാലിദ് അന്താരാഷ്ട്ര വിമാനത്താവളം, തലസ്ഥാനത്തെ അരാംകോ ഭരണകാര്യാലയം എന്നിവയ്ക്ക് നേരെയും നേരത്തെ ആക്രമണ ശ്രമങ്ങൾ നടന്നിരുന്നതായി റോയിട്ടേഴ്സ് റിപ്പോർട്ട് ചെയ്യുന്നു. ഇത്തരം ആക്രമണങ്ങൾ ജനവാസ മേഖലകൾക്ക് ഭീഷണിയാകുകയും വ്യോമഗതാഗതം തടസ്സപ്പെടുത്തുകയും ചെയ്യുന്നുണ്ട്.
ഇതിന് മറുപടിയായി യെമനിലെ സഅദ, സൻആ, അൽ-ഹുദൈദ, അൽ-ജൗഫ്, മാരിബ് എന്നീ പ്രവിശ്യകളിലെ ഹൂതികളുടെ മിസൈൽ വിക്ഷേപണ കേന്ദ്രങ്ങളും ആയുധപ്പുരകളും സഖ്യസേന തകർത്തിരുന്നു. ഇറാൻ ഉൾപ്പെട്ട മേഖലയിലെ വിശാലമായ സംഘർഷങ്ങളുടെ ഭാഗമായുള്ള ഈ ആക്രമണങ്ങൾ അറേബ്യൻ ഉപദ്വീപിലും ചെങ്കടൽ മേഖലയിലും സുരക്ഷാ ഭീഷണി വർദ്ധിപ്പിച്ചിരിക്കുകയാണ്. സിവിലിയൻ കേന്ദ്രങ്ങൾക്ക് നേരെയുള്ള ആക്രമണങ്ങളെ ശക്തമായി അപലപിച്ച സൗദി അറേബ്യ, തങ്ങളുടെ പ്രദേശത്തെയും ജനങ്ങളെയും സുപ്രധാന കേന്ദ്രങ്ങളെയും സംരക്ഷിക്കാൻ ഏതറ്റം വരെയും പോകുമെന്ന് വ്യക്തമാക്കി.



