ഇസ്ലാമാബാദ്: ഇറാൻ-അമേരിക്ക യുദ്ധത്തിന് അന്ത്യം കുറിക്കുന്നതിനുള്ള ഔദ്യോഗിക ആവശ്യങ്ങളുടെ പട്ടിക പാകിസ്ഥാന് കൈമാറിയ ശേഷം ഇറാൻ വിദേശകാര്യമന്ത്രി അബ്ബാസ് അരാഗ്ചി ഇസ്ലാമാബാദിൽ നിന്ന് മടങ്ങി. പാക് വിദേശകാര്യമന്ത്രി ഇഷാഖ് ദാർ, സൈനിക മേധാവി ജനറൽ ആസിം മുനീർ എന്നിവരുമായി നടത്തിയ ഉന്നതതല കൂടിക്കാഴ്ചകൾക്ക് ശേഷമാണ് അദ്ദേഹം നയതന്ത്ര പര്യടനത്തിന്റെ അടുത്ത ഘട്ടത്തിനായി മസ്കറ്റിലേക്ക് പുറപ്പെട്ടത്. പത്ത് നിർദ്ദേശങ്ങളടങ്ങിയ ഇറാൻ്റെ സമാധാന പദ്ധതിയാണ് അരാഗ്ചി മധ്യസ്ഥരായ പാകിസ്ഥാന് കൈമാറിയത്. യുഎസ് ഏർപ്പെടുത്തിയിരിക്കുന്ന നാവിക ഉപരോധം നീക്കുക, സെക്കൻഡറി ഉപരോധങ്ങൾ അവസാനിപ്പിക്കുക, യുദ്ധക്കെടുതികൾക്ക് നഷ്ടപരിഹാരം നൽകുക, തങ്ങളുടെ സഖ്യകക്ഷികളായ ഹിസ്ബുള്ളയ്ക്കും ഹൂതികൾക്കും നേരെയുള്ള ആക്രമണങ്ങൾ നിർത്തുക തുടങ്ങിയവയാണ് ഇറാൻ്റെ പ്രധാന ആവശ്യങ്ങൾ.
അതേസമയം, അമേരിക്കൻ പ്രതിനിധികളായ സ്റ്റീവ് വിറ്റ്കോഫും ജാറെഡ് കുഷ്നറും ചർച്ചകൾക്കായി ഇസ്ലാമാബാദിലെത്തുന്നുണ്ടെങ്കിലും, ഉപരോധം പിൻവലിക്കാതെ വാഷിംഗ്ടണുമായി നേരിട്ടുള്ള ചർച്ചകൾക്കില്ലെന്ന നിലപാടിലാണ് ഇറാൻ. ആണവായുധങ്ങൾ പൂർണ്ണമായും ഉപേക്ഷിച്ചാൽ മാത്രമേ ഇറാന് ‘നല്ലൊരു കരാർ’ നൽകൂ എന്ന് യുഎസ് ഡിഫൻസ് സെക്രട്ടറി പീറ്റ് ഹെഗ്സെത്ത് വ്യക്തമാക്കിയിട്ടുണ്ട്. ചർച്ചകളിൽ വിട്ടുവീഴ്ചയ്ക്ക് തയ്യാറാകാത്ത ട്രംപ് ഭരണകൂടത്തിൻ്റെ കർശന നിലപാടുകൾ നിലവിൽ സമാധാന ശ്രമങ്ങളെ സങ്കീർണ്ണമാക്കുന്നു. പാകിസ്ഥാന് പുറമെ റഷ്യയുടെയും ഒമാന്റെയും പിന്തുണ ഉറപ്പാക്കാനാണ് അരാഗ്ചിയുടെ നീക്കം. പശ്ചിമേഷ്യയിലെ സംഘർഷം ആഗോള സാമ്പത്തിക മേഖലയെയും വിതരണ ശൃംഖലയെയും സാരമായി ബാധിച്ചിരിക്കുന്ന സാഹചര്യത്തിൽ, ഇറാൻ്റെ ഈ പുതിയ നയതന്ത്ര നീക്കങ്ങളെ അന്താരാഷ്ട്ര സമൂഹം വലിയ പ്രാധാന്യത്തോടെയാണ് ഉറ്റുനോക്കുന്നത്.
