കൊൽക്കത്ത: പശ്ചിമ ബംഗാളിൽ തൃണമൂൽ കോൺഗ്രസ് നേതാക്കൾക്ക് നേരെ ജനരോഷം ശക്തമാകുന്നു. അഭിഷേക് ബാനർജിക്ക് നേരെ ഉണ്ടായ ആക്രമണത്തിന് പിന്നാലെ, ശ്രീരാംപൂർ എം.പിയായ കല്യാൺ ബാനർജിക്ക് നേരെയും സ്വന്തം മണ്ഡലമായ ഹൂഗ്ലിയിലെ ചണ്ഡിതലയിൽ വെച്ച് ആക്രമണമുണ്ടായി. പോലീസ് ജനക്കൂട്ടത്തെ നിയന്ത്രിക്കാൻ ശ്രമിക്കുന്നതിനിടെയാണ് എം.പിക്ക് തലയ്ക്ക് അടിയേറ്റത്. തെരഞ്ഞെടുപ്പിന് ശേഷമുള്ള അക്രമ സംഭവങ്ങളിൽ പരാതി നൽകാൻ ചണ്ഡിതല പോലീസ് സ്റ്റേഷനിലെത്തിയതായിരുന്നു കല്യാൺ ബാനർജിയും അനുയായികളും. ആക്രമണത്തിൽ ബി.ജെ.പിക്ക് പങ്കുണ്ടെന്ന് അദ്ദേഹം ആരോപിക്കുകയും, തന്നെ വധിക്കാൻ ശ്രമിച്ചതാണെന്ന് വ്യക്തമാക്കുകയും ചെയ്തു. സംഭവസമയത്ത് ബംഗാൾ പോലീസ് കാഴ്ചക്കാരായി നിന്നപ്പോൾ കേന്ദ്രസേനയാണ് തന്റെ ജീവൻ രക്ഷിച്ചതെന്നും അദ്ദേഹം ആരോപിച്ചു.
ഇതിന് തൊട്ടുമുമ്പുള്ള ദിവസമാണ് സൗത്ത് പർഗാനാസിലെ സോനാർപൂരിൽ വെച്ച് തൃണമൂൽ കോൺഗ്രസ് നേതാവ് അഭിഷേക് ബാനർജിക്ക് നേരെ ജനരോഷം ഉണ്ടായത്. അക്രമികൾ അദ്ദേഹത്തിന് നേരെ കല്ലുകളും മുട്ടകളും എറിയുകയായിരുന്നു. സുരക്ഷാ ഉദ്യോഗസ്ഥർ ഹെൽമറ്റ് ധരിപ്പിച്ചാണ് അദ്ദേഹത്തെ സുരക്ഷിത സ്ഥാനത്തേക്ക് മാറ്റിയത്. സംഭവത്തിൽ നിസ്സാര പരിക്കേറ്റ അഭിഷേക് ബാനർജിയെ കൊൽക്കത്തയിലെ ഒരു സ്വകാര്യ ആശുപത്രിയിൽ പ്രവേശിപ്പിച്ചു. ഹെൽമറ്റ് ധരിച്ചിരുന്നില്ലെങ്കിൽ അദ്ദേഹം കൊല്ലപ്പെടുമായിരുന്നുവെന്ന് മമത ബാനർജി പ്രതികരിക്കുകയും, ഈ ആക്രമണങ്ങൾക്ക് പിന്നിൽ ബി.ജെ.പി ആണെന്ന് ആരോപിക്കുകയും ചെയ്തു. എന്നാൽ, കഴിഞ്ഞ 15 വർഷത്തെ ഭരണപരാജയത്തിന്റെ ഫലമാണിതെന്നാണ് ബി.ജെ.പി ഈ ആരോപണങ്ങൾക്ക് മറുപടി നൽകിയത്.
