ജിദ്ദ: പ്രമുഖ വ്യവസായിയും ജീവകാരുണ്യ പ്രവർത്തകനും കൊണ്ടോട്ടിയിലെ മുൻ ഇടതുപക്ഷ സ്ഥാനാർത്ഥിയുമായിരുന്ന കെ.പി. സുലൈമാൻ ഹാജിക്ക് ജിദ്ദ കിങ് അബ്ദുൽഅസീസ് അന്താരാഷ്ട്ര വിമാനത്താവളത്തിൽ കെ.എം.സി.സി ഭാരവാഹികൾ ഊഷ്മളമായ സ്വീകരണം നൽകി. കഴിഞ്ഞ ദിവസം പാണക്കാട് വെച്ച് മുസ്ലിം ലീഗ് സംസ്ഥാന നേതൃത്വത്തിൽ നിന്നും ഔദ്യോഗികമായി പാർട്ടി മെമ്പർഷിപ്പ് സ്വീകരിച്ച ശേഷമാണ് അദ്ദേഹം ജിദ്ദയിൽ തിരിച്ചെത്തിയത്. ദീർഘകാലം ഇടതുപക്ഷ സഹയാത്രികനായിരുന്ന സുലൈമാൻ ഹാജി മുസ്ലിം ലീഗിലേക്ക് മടങ്ങിയെത്തിയതിന് ശേഷം ആദ്യമായി സൗദി അറേബ്യയിൽ എത്തിയപ്പോഴാണ് ജിദ്ദ കെ.എം.സി.സി കൊണ്ടോട്ടി മണ്ഡലം കമ്മിറ്റിയുടെ നേതൃത്വത്തിൽ ഈ സ്വീകരണ ചടങ്ങ് സംഘടിപ്പിച്ചത്.
കൊണ്ടോട്ടി മണ്ഡലം കെ.എം.സി.സി ചെയർമാൻ കെ.പി. അബ്ദുറഹ്മാൻ, ജനറൽ സെക്രട്ടറി അൻവർ വെട്ടുപ്പാറ, ട്രഷറർ എം.എം. മുജീബ് എന്നിവരും ഭാരവാഹികളായ ശറഫു വാഴക്കാട്, യാസർ മാസ്റ്റർ തുടങ്ങിയ പ്രമുഖ നേതാക്കളും വിമാനത്താവളത്തിലെ സ്വീകരണത്തിന് നേരിട്ട് നേതൃത്വം നൽകി. ഹാരമണിയിച്ചും പൊന്നാടയണിയിച്ചുമാണ് കെ.എം.സി.സി പ്രവർത്തകർ അദ്ദേഹത്തെ വരവേറ്റത്. ഇടതുപക്ഷ ചേരി വിട്ട് യു.ഡി.എഫിന്റെയും ലീഗിന്റെയും ഭാഗമായ സുലൈമാൻ ഹാജിയുടെ രാഷ്ട്രീയ മാറ്റം മലബാറിലെയും ഒപ്പം ഗൾഫ് മേഖലയിലെയും രാഷ്ട്രീയ അണികൾക്കിടയിൽ വലിയ ചർച്ചയായി മാറിയിട്ടുണ്ട്. വരും ദിവസങ്ങളിൽ ജിദ്ദയിലെ വിവിധ മലയാളി കൂട്ടായ്മകളും കെ.എം.സി.സിയും അദ്ദേഹത്തിന് കൂടുതൽ സ്വീകരണ പരിപാടികൾ ഒരുക്കുന്നുണ്ടെന്നാണ് വിവരം.
