തിരുവനന്തപുരം: കേരള മുഖ്യമന്ത്രി വി.ഡി. സതീശൻ നാളെ (വ്യാഴാഴ്ച) രാവിലെ ആറുമണിക്ക് ലളിതമായ ചടങ്ങുകളോടെ തന്റെ ഔദ്യോഗിക വസതിയായ ക്ലിഫ് ഹൗസിലേക്ക് താമസം മാറും. മുഖ്യമന്ത്രിയായി സ്ഥാനമേറ്റെടുത്ത ശേഷവും മുൻപ് പ്രതിപക്ഷ നേതാവായിരുന്ന കാലത്ത് ഉപയോഗിച്ചിരുന്ന കന്റോൺമെന്റ് ഹൗസിലായിരുന്നു വി.ഡി. സതീശൻ ഇതുവരെ താമസിച്ചിരുന്നത്. മുൻ മുഖ്യമന്ത്രി പിണറായി വിജയൻ ക്ലിഫ് ഹൗസ് ഒഴിഞ്ഞിരുന്നെങ്കിലും, കെട്ടിടത്തിൽ വരുത്തേണ്ടിയിരുന്ന അടിയന്തര അറ്റകുറ്റപ്പണികൾ പൂർത്തിയാകാത്തതിനാലാണ് മുഖ്യമന്ത്രിയുടെ താമസം മാറ്റം നീണ്ടുപോയത്. പൊതുമരാമത്ത് വകുപ്പിന്റെ മേൽനോട്ടത്തിൽ ദീർഘകാലമായി നടന്നുവന്ന നവീകരണ പ്രവർത്തനങ്ങളുടെ ഭാഗമായി ചോർച്ചയടയ്ക്കലും പെയിന്റിങും ഉൾപ്പെടെയുള്ള പണികൾ അവസാനഘട്ടത്തിലെത്തിയിട്ടുണ്ട്. ചെറിയ ചില മിനുക്കുപണികൾ കൂടി ബാക്കിയുണ്ടെങ്കിലും ഔദ്യോഗിക വസതിയിലേക്ക് മാറുന്നതിന് മറ്റ് തടസ്സങ്ങളില്ലാത്ത സാഹചര്യത്തിലാണ് നാളെ തന്നെ താമസം മാറാൻ തീരുമാനിച്ചത്. കഴിഞ്ഞ കുറച്ചു ദിവസങ്ങളായി ക്ലിഫ് ഹൗസിലെ അവസാനഘട്ട ഒരുക്കങ്ങൾ അതിവേഗത്തിലാണ് പുരോഗമിച്ചിരുന്നത്.
മുഖ്യമന്ത്രി ക്ലിഫ് ഹൗസിലേക്ക് മാറുന്നതോടെ, അദ്ദേഹം നിലവിൽ താമസിക്കുന്ന കന്റോൺമെന്റ് ഹൗസ് പുതിയ പ്രതിപക്ഷ നേതാവ് പിണറായി വിജയന് ഔദ്യോഗിക വസതിയായി അനുവദിക്കും. മുഖ്യമന്ത്രി കന്റോൺമെന്റ് ഹൗസിൽ തുടരുന്നതിനെതിരെ പ്രതിപക്ഷ നേതാവെന്ന നിലയിൽ പിണറായി വിജയൻ നേരത്തെ പരസ്യമായി അതൃപ്തി പ്രകടിപ്പിച്ചിരുന്നു. കന്റോൺമെന്റ് ഹൗസ് ലഭിക്കാത്തത് തന്റെ ഔദ്യോഗിക പ്രവർത്തനങ്ങളെ ബാധിക്കുന്നുണ്ടെന്ന് അദ്ദേഹം വാർത്താസമ്മേളനത്തിൽ ഉന്നയിക്കുകയും ചെയ്തിരുന്നു. മുഖ്യമന്ത്രിയുടെ ഈ വസതി മാറ്റത്തോടെ പ്രതിപക്ഷ നേതാവിന്റെ വസതിയുമായി ബന്ധപ്പെട്ട് രാഷ്ട്രീയ കേന്ദ്രങ്ങളിൽ നിലനിന്നിരുന്ന തർക്കങ്ങൾക്കും അനിശ്ചിതത്വങ്ങൾക്കുമാണ് ഇപ്പോൾ പൂർണ്ണ വിരാമമാകുന്നത്.
