ന്യൂഡൽഹി: നീറ്റ് ചോദ്യപ്പേപ്പർ ചോർച്ച, സി.ബി.എസ്.ഇ പുനർമൂല്യനിർണയത്തിലെ അപാകതകൾ എന്നിവയുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന് ആവശ്യപ്പെട്ട് കോക്രോച്ച് ജനതാ പാർട്ടി (സി.ജെ.പി) നടത്തുന്ന പ്രക്ഷോഭത്തിന് പിന്തുണ പ്രഖ്യാപിച്ച് കോൺഗ്രസ് നേതാക്കളുടെ വൻ പ്രതിഷേധം. പ്രധാനമന്ത്രി നരേന്ദ്ര മോദിയുടെ വസതിക്ക് മുന്നിൽ കൈകൾ കൂട്ടിക്കെട്ടി പ്രതിഷേധിച്ച കൊടിക്കുന്നിൽ സുരേഷ് എം.പി ഉൾപ്പെടെയുള്ള കോൺഗ്രസ് എം.പിമാരെ ഡൽഹി പൊലീസ് അറസ്റ്റ് ചെയ്തു നീക്കി. എ.ഐ.സി.സി അധ്യക്ഷൻ മല്ലികാർജുൻ ഖാർഗെ, ലോക്സഭ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി, കേരള മുഖ്യമന്ത്രി വി.ഡി. സതീശൻ തുടങ്ങിയ പ്രമുഖ നേതാക്കളും എം.പിമാരും പ്രതിഷേധത്തിൽ പങ്കെടുത്തു. പാർലമെന്റിന്റെ മൺസൂൺ സമ്മേളനത്തിന്റെ രണ്ടാം ദിനത്തിലാണ് തലസ്ഥാനത്ത് പ്രതിഷേധം കടുത്തത്. സമരക്കാരായ വിദ്യാർത്ഥികൾക്ക് നേരെ പൊലീസ് നടത്തുന്ന അടിച്ചമർത്തലിൽ പ്രധാനമന്ത്രി മറുപടി പറയണമെന്നും വിഷയത്തിൽ പാർലമെന്റിൽ ചർച്ച നടത്താൻ സർക്കാർ തയ്യാറാകുന്നില്ലെന്നും രാഹുൽ ഗാന്ധി കുറ്റപ്പെടുത്തി.
അതേസമയം, ജന്തർ മന്തറിൽ വിദ്യാർത്ഥികളും സി.ജെ.പി പ്രവർത്തകരും നടത്തുന്ന സമരം കൂടുതൽ ശക്തമായി മുന്നോട്ടുപോവുകയാണ്. തിങ്കളാഴ്ച രാവും പകലും നീണ്ട സംഘർഷങ്ങൾക്കൊടുവിൽ ഡൽഹി പൊലീസ് സമരപ്പന്തൽ പൊളിച്ചുനീക്കിയെങ്കിലും പ്രക്ഷോഭകർ വീണ്ടും ജന്തർ മന്തറിൽ തിരിച്ചെത്തി താൽക്കാലിക ടെന്റുകളും വേദിയും പുനഃസ്ഥാപിച്ചു. ജൂൺ 20-ന് ആരംഭിച്ച സമരത്തിന് പിന്തുണയുമായി ജൂൺ 28 മുതൽ പ്രമുഖ പരിസ്ഥിതി പ്രവർത്തകൻ സോനം വാങ്ചുക് അനിശ്ചിതകാല നിരാഹാര സമരം ആരംഭിച്ചിരുന്നു. തുടർന്ന് ആരോഗ്യനില വഷളായ അദ്ദേഹത്തെ ജൂലൈ 18-ന് പൊലീസ് നാടകീയമായി ആശുപത്രിയിലേക്ക് മാറ്റിയെങ്കിലും, വാങ്ചുക് ആശുപത്രി കിടക്കയിലും നിരാഹാരം തുടരുകയാണ്. വാങ്ചുക്കിന് പിന്നാലെ സി.ജെ.പി സ്ഥാപകൻ അഭിജിത് ദീപ്കെ സമരവേദിയിൽ നിരാഹാര സമരം ഏറ്റെടുത്തിട്ടുണ്ട്. കേന്ദ്ര വിദ്യാഭ്യാസ മന്ത്രിയുടെ രാജിയില്ലാതെ പ്രക്ഷോഭത്തിൽ നിന്ന് പിന്നോട്ടില്ലെന്ന് സി.ജെ.പി ഭാരവാഹികൾ വ്യക്തമാക്കി.
