തിരുവനന്തപുരം: മാധ്യമപ്രവർത്തകൻ കെ.എം. ബഷീർ വാഹനാപകടത്തിൽ കൊല്ലപ്പെട്ട കേസിന്റെ വിചാരണ നടപടികൾക്കിടെ പ്രോസിക്യൂഷന് കനത്ത തിരിച്ചടി. കേസിൽ നിർണായക രഹസ്യമൊഴി നൽകിയിരുന്ന ആറാം സാക്ഷിയും ഓട്ടോ ഡ്രൈവറുമായ ഷഫീഖ് വിചാരണവേളയിൽ കോടതിയിൽ കൂറുമാറി. ഒന്നാം പ്രതിയും ഐ.എ.എസ് ഉദ്യോഗസ്ഥനുമായ ശ്രീറാം വെങ്കിട്ടരാമന് അനുകൂലമായാണ് തിരുവനന്തപുരം നാലാം അഡീഷണൽ സെഷൻസ് കോടതിയിൽ സാക്ഷി മൊഴി നൽകിയത്.
അപകടസമയത്ത് ശ്രീറാം വെങ്കിട്ടരാമൻ ഓടിച്ച കാർ അമിതവേഗതയിലെത്തി കെ.എം. ബഷീറിന്റെ ബൈക്കിൽ ഇടിക്കുന്നത് നേരിട്ടു കണ്ടെന്നായിരുന്നു ഷഫീഖ് മുൻപ് പോലീസിനും മജിസ്ട്രേറ്റിനും നൽകിയ രഹസ്യമൊഴി. എന്നാൽ വിചാരണവേളയിൽ വലിയ ശബ്ദം കേട്ട് പുറത്തുവന്നപ്പോൾ കാർ ബൈക്കിൽ ഇടിച്ചുകിടക്കുന്നതാണ് കണ്ടതെന്നും വാഹനം ഓടിച്ചത് ശ്രീറാമാണെന്ന് നാട്ടുകാരും പോലീസും പറയുന്നത് കേട്ട അറിവ് മാത്രമാണെന്നും ഇയാൾ തിരുത്തിപ്പറഞ്ഞു. കേസിൽ ഇതുവരെ നാല് സാക്ഷികളുടെ വിസ്താരമാണ് പൂർത്തിയായത്.
2019 ഓഗസ്റ്റ് മൂന്നിന് പുലർച്ചെ തിരുവനന്തപുരം മ്യൂസിയത്തിന് സമീപമാണ് അപകടം നടന്നത്. കേസിൽ തുടക്കം മുതൽ ശ്രീറാമിനെ രക്ഷിക്കാൻ രക്തപരിശോധന വൈകിപ്പിക്കൽ അടക്കം വലിയ അട്ടിമറി ശ്രമങ്ങൾ നടന്നതായി ആരോപണമുയർന്നിരുന്നു. നിലവിൽ സ്കിൽസ് എക്സലൻസി അക്കാദമി എം.ഡി-യായ ശ്രീറാം വെങ്കിട്ടരാമൻ മാത്രമാണ് കേസിൽ ഏക പ്രതി. രണ്ടാം പ്രതിയായിരുന്ന വഫ ഫിറോസിനെ മുൻപ് കുറ്റപത്രത്തിൽ നിന്ന് ഒഴിവാക്കിയിരുന്നു.
അതേസമയം, പ്രതിഭാഗം അഭിഭാഷകന്റെ ആരോഗ്യപ്രശ്നങ്ങൾ ചൂണ്ടിക്കാട്ടി വിചാരണ ഒന്നാം അഡീഷണൽ ജില്ലാ സെഷൻസ് കോടതിയിൽ നിന്ന് നാലാം കോടതിയിലേക്ക് മാറ്റിയതിനെതിരെ കെ.എം. ബഷീറിന്റെ ഭാര്യ സി. ജസീല ഹൈക്കോടതിയെ സമീപിച്ചു. കോടതി മാറ്റത്തിൽ ആശങ്കയുണ്ടെന്നും വിചാരണ നീതിപൂർവ്വമാകില്ലെന്നും ചൂണ്ടിക്കാട്ടിയ ഹർജിയിൽ ഹൈക്കോടതി സംസ്ഥാന സർക്കാരിന് നോട്ടീസ് അയച്ചിട്ടുണ്ട്.
