ടെഹ്റാൻ: രാജ്യത്തിന്റെയും ജനങ്ങളുടെയും സുരക്ഷ ഉറപ്പാക്കുന്നതിനായി ലഭ്യമായ അത്യാധുനിക സാങ്കേതികവിദ്യകൾ ഉപയോഗിച്ച് ഇറാൻ നിരന്തരം പുതിയ ആയുധങ്ങൾ രൂപകൽപ്പന ചെയ്യുകയും നിലവിലുള്ള സൈനിക ഉപകരണങ്ങൾ ആധുനികീകരിക്കുകയും ചെയ്തുവരികയാണെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) വക്താവ് ജനറൽ ഹുസൈൻ മൊഹെബ്ബി പ്രസ്താവിച്ചു. നിലവിലെ യുദ്ധം മറ്റ് രൂപങ്ങളിലേക്ക് വഴിമാറുകയാണെങ്കിൽ മുൻപ് പ്രയോഗിക്കാത്ത പുതിയ മാരകായുധങ്ങൾ ഇറാൻ യുദ്ധക്കളത്തിലിറക്കുമെന്നും അദ്ദേഹം കടുത്ത മുന്നറിയിപ്പ് നൽകി.
യുദ്ധസമയത്ത് സ്വന്തം സുരക്ഷ പോലും ഉറപ്പാക്കാൻ സാധിക്കാത്ത വിധം പശ്ചിമേഷ്യയിലെ അമേരിക്കൻ സൈനിക താവളങ്ങൾ തകർന്നിരിക്കുകയാണെന്നും അവയിൽ ഭൂരിഭാഗവും പൂർണ്ണമായും ഉപയോഗശൂന്യമായതായും ജനറൽ മൊഹെബ്ബി ചൂണ്ടിക്കാട്ടി. വൻ സാമ്പത്തിക ബാധ്യത വരുത്തുന്നതിനാൽ ഇവ ഇനി പുനർനിർമ്മിക്കുക അമേരിക്കയ്ക്ക് സാധ്യമല്ല. തങ്ങളുടെ മണ്ണിലെ യു.എസ് സൈനിക താവളങ്ങൾ സുരക്ഷയ്ക്ക് ഭീഷണിയാണെന്ന് അയൽരാജ്യങ്ങൾ തിരിച്ചറിഞ്ഞുകഴിഞ്ഞു. അതിനാൽ ഇറാന്നും അയൽരാജ്യങ്ങൾക്കുമിടയിലുള്ള പരമ്പരാഗത ബന്ധങ്ങളും ആശയവിനിമയ പാതകളും വിച്ഛേദിക്കാൻ വാഷിംഗ്ടണിന് ഇനി കഴിയില്ല.
ഇറാന്റെ വടക്കുപടിഞ്ഞാറൻ, തെക്കുകിഴക്കൻ അതിർത്തി പ്രദേശങ്ങളിലെ സായുധ വിഘടനവാദ ഗ്രൂപ്പുകൾക്ക് അമേരിക്ക നൽകിയ പിന്തുണ പൂർണ്ണ പരാജയത്തിലാണ് കലാശിച്ചതെന്നും അദ്ദേഹം കൂട്ടിച്ചേർത്തു. പരാജയം സമ്മതിച്ച് പശ്ചിമേഷ്യൻ മേഖലയിൽ നിന്ന് സൈന്യത്തെ പൂർണ്ണമായി പിൻവലിക്കുകയല്ലാതെ മറ്റ് മാർഗ്ഗങ്ങളൊന്നും അമേരിക്കയ്ക്ക് മുന്നിലില്ലെന്നും, വാഷിംഗ്ടണിന്റെ പൂർണ്ണ പിന്മാറ്റത്തോടെ മാത്രമേ ഇറാന്റെ പ്രതിരോധ പോരാട്ടങ്ങൾ അവസാനിക്കുകയുള്ളൂവെന്നും ഐ.ആർ.ജി.സി വക്താവ് വ്യക്തമായി പ്രഖ്യാപിച്ചു.
