ഉജ്ജയിൻ: മധ്യപ്രദേശിലെ ഉജ്ജയിനിൽ പാത വികസനത്തിന്റെ ഭാഗമായി ഷാഹി മസ്ജിദിന്റെ ചില ഭാഗങ്ങൾ നീക്കം ചെയ്യുന്നതിനിടെ, പള്ളിയുടെ മിനാരം തകർന്ന് കെട്ടിടത്തിന് മുകളിലേക്ക് വീണു. വ്യാഴാഴ്ച നടന്ന ഈ സംഭവത്തിൽ പള്ളിയുടെ മേൽക്കൂരയ്ക്കും മറ്റ് ഭാഗങ്ങൾക്കും സാരമായ കേടുപാടുകൾ സംഭവിച്ചു. എന്നാൽ അപകടത്തിൽ ആർക്കും പരിക്കേറ്റിട്ടില്ലെന്ന് പ്രാദേശിക ഭരണകൂടവും ജില്ലാ കളക്ടറും അറിയിച്ചു.
2028-ലെ സിംഹസ്ഥ കുംഭമേളയ്ക്കുള്ള മുന്നൊരുക്കങ്ങളുടെ ഭാഗമായി കാന്ത്ൽ-ഗോപാൽ മന്ദിർ റോഡ് വീതികൂട്ടുന്ന പ്രവൃത്തികളാണ് പ്രദേശത്ത് നടക്കുന്നത്. റോഡ് വികസന പരിധിയിൽപ്പെടുന്ന പള്ളിയുടെ മുൻഭാഗം നീക്കം ചെയ്യുന്നതിനായി ജില്ലാ ഭരണകൂടവും പള്ളി കമ്മിറ്റിയും തമ്മിൽ മുൻപ് ധാരണയിലെത്തിയിരുന്നു. ഇതിന്റെ അടിസ്ഥാനത്തിൽ കഴിഞ്ഞ ദിവസങ്ങളിലായി ഈ ഭാഗങ്ങൾ നീക്കം ചെയ്തുവരികയായിരുന്നു. യന്ത്രസഹായത്തോടെ മിനാരത്തിന്റെ ഭാഗങ്ങൾ നീക്കുന്നതിനിടെ ക്രെയിനിന്റെയോ യന്ത്രത്തിന്റെയോ ബെൽറ്റ് പൊട്ടിയതാണ് അപകടത്തിന് കാരണമായതെന്ന് റിപ്പോർട്ടുകൾ വ്യക്തമാക്കുന്നു.
അപകടത്തെ തുടർന്ന് തകരാർ സംഭവിച്ച ഭാഗങ്ങളുടെ അറ്റകുറ്റപ്പണികൾ ഭരണകൂടത്തിന്റെ മേൽനോട്ടത്തിൽ ആരംഭിച്ചിട്ടുണ്ട്. തെറ്റായ വിവരങ്ങളും വ്യാജ പ്രചാരണങ്ങളും സോഷ്യൽ മീഡിയയിലൂടെ പ്രചരിപ്പിക്കരുതെന്നും പ്രദേശത്ത് സമാധാനം നിലനിർത്തണമെന്നും ജില്ലാ ഭരണകൂടം പൊതുജനങ്ങളോട് അഭ്യർത്ഥിച്ചു. പള്ളിയും പരിസര പ്രദേശങ്ങളും നിലവിൽ സുരക്ഷാ സേനയുടെ കർശന നിരീക്ഷണത്തിലാണ്.
