ന്യൂഡൽഹി: ഡൽഹിയിൽ കോക്രോച്ച് ജനതാ പാർട്ടി (സി.ജെ.പി) ഉൾപ്പെടെയുള്ള യുവജന പ്രസ്ഥാനങ്ങളുടെ നേതൃത്വത്തിൽ നടക്കുന്ന സമരം മറ്റൊരു സ്വാതന്ത്ര്യസമരത്തിന് തുല്യമാണെന്ന് പ്രശസ്ത നടനും സാമൂഹിക പ്രവർത്തകനുമായ പ്രകാശ് രാജ്. രാജ്യം എല്ലാ മേഖലകളിലും തകർച്ചയെ നേരിടുന്ന ഘട്ടത്തിൽ അതിൽ നിന്ന് രാജ്യത്തെ രക്ഷിക്കാനുള്ള അതിശക്തമായ ശ്രമമാണ് യുവാക്കൾ നടത്തുന്നതെന്നും അദ്ദേഹം അഭിപ്രായപ്പെട്ടു. മീഡിയവണിന് നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു അദ്ദേഹം.
ഡൽഹിയുടെ തെരുവുകളിൽ കാണുന്നത് യുവാക്കളുടെ കേവലമായ രോഷമല്ലെന്നും, മറിച്ച് നല്ലൊരു ഭാവിക്കും രാജ്യത്തിനുമായുള്ള അവരുടെ നെഞ്ചിലെ വേദനയാണെന്നും അദ്ദേഹം വ്യക്തമാക്കി. യുവാക്കളുടെ സംഘടിത ശക്തിയെ ഭയക്കുന്നതുകൊണ്ടാണ് കേന്ദ്ര ഭരണകൂടം അവരുടെ ശബ്ദത്തെ അടിച്ചമർത്താൻ ശ്രമിക്കുന്നത്. വെടിയുണ്ടകളും പെല്ലറ്റ് തോക്കുകളും എ.കെ-47 ഉൾപ്പെടെയുള്ള ആയുധങ്ങളും ഉപയോഗിച്ച് പ്രക്ഷോഭങ്ങളെ ഒതുക്കിത്തീർക്കാൻ നോക്കുകയാണ്. എന്നാൽ എത്രത്തോളം അടിച്ചമർത്താൻ ശ്രമിക്കുന്നുവോ അത്രത്തോളം തീവ്രമായി യുവാക്കൾ പ്രതിഷേധിക്കുമെന്ന യാഥാർത്ഥ്യം ഭരണകൂടം വിസ്മരിക്കുകയാണെന്ന് പ്രകാശ് രാജ് കുറ്റപ്പെടുത്തി.
“തെറ്റ് ചെയ്തവരോട് ഭാവി തലമുറ ഒരുപക്ഷേ ക്ഷമിച്ചേക്കാം, എന്നാൽ അനീതിക്ക് നേരെ കണ്ണടച്ച് നിശബ്ദരായിരുന്നവരോട് ചരിത്രം ഒരിക്കലും ക്ഷമിക്കില്ല. അതുകൊണ്ട് ഈ മുന്നേറ്റം ലക്ഷ്യം കാണുന്നത് വരെ തുടരേണ്ടതുണ്ട്. വിജയിക്കുന്നത് വരെ പോരാടുക. സ്വാതന്ത്ര്യത്തിന് വേണ്ടി നാം എത്രയോ കാലം പോരാടിയിട്ടുണ്ട്. ജന്തർ മന്തറിലെ പ്രതിഷേധങ്ങൾ ജനങ്ങളുടെ ഉള്ളിലെ ഭയം പൂർണ്ണമായി തുടച്ചുനീക്കി. ഇനി ഭരണാധികാരികളോട് ചോദ്യങ്ങൾ ചോദിക്കാൻ ആർക്കും ഭയമില്ല,” പ്രകാശ് രാജ് പറഞ്ഞു.
തന്റെ സാമൂഹിക-രാഷ്ട്രീയ ഇടപെടലുകളെക്കുറിച്ചും അഭിമുഖത്തിൽ അദ്ദേഹം സംസാരിച്ചു. കോളേജ് കാലം മുതൽ സന്നദ്ധപ്രവർത്തനങ്ങളിൽ സജീവമായിരുന്ന തന്റെ ജീവിതത്തിലേക്ക് മുതിർന്ന മാധ്യമപ്രവർത്തക ഗൗരി ലങ്കേഷിന്റെ വധത്തിന് ശേഷമാണ് വലിയൊരു ദൗത്യം വന്നുചേർന്നത്. ലോകത്ത് ഏതൊരു ഭരണകൂടം ജനങ്ങളുടെ ശബ്ദത്തെ ഇല്ലാതാക്കാൻ ശ്രമിക്കുന്നുവോ, അവിടെ അതിനേക്കാൾ ഉച്ചത്തിൽ പുതിയ ശബ്ദങ്ങൾ ഉയർന്നുവരും. ഗൗരി ലങ്കേഷ് കൊല്ലപ്പെട്ടപ്പോൾ അത്തരമൊരു ശബ്ദമായി മാറാൻ താൻ നിർബന്ധിതനാവുകയായിരുന്നുവെന്നും പ്രകാശ് രാജ് കൂട്ടിച്ചേർത്തു.
