വാഷിംഗ്ടൺ: യു.എസ് മിഡ്‌ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ പരമ്പരാഗത കോട്ടകളിൽ വൻ അട്ടിമറി വിജയവുമായി ഡെമോക്രാറ്റിക് പാർട്ടി. ടെക്സസ്, ജോർജിയ, ഐയോവ, ഒഹായോ തുടങ്ങി വർഷങ്ങളായി റിപ്പബ്ലിക്കൻമാർ കുത്തകയാക്കി വെച്ചിരുന്ന സംസ്ഥാനങ്ങളിലെ ഗവർണർ പദവികൾ ഡെമോക്രാറ്റുകൾ പിടിച്ചെടുത്തു. ഈ ചരിത്രപരമായ മുന്നേറ്റത്തോടെ രണ്ട് പതിറ്റാണ്ടിന് ശേഷം അമേരിക്കയിലെ ഭൂരിഭാഗം ഗവർണർ സ്ഥാനങ്ങളും ഡെമോക്രാറ്റിക് പാർട്ടിയുടെ കൈകളിൽ എത്തിയിരിക്കുകയാണ്.
പ്രസിഡന്റ് തിരഞ്ഞെടുപ്പിൽ നിർണായകമായ ജോർജിയയിൽ കെയ്ഷ ലാൻസ് ബോട്ടംസ് നേടിയ വിജയം യു.എസ് രാഷ്ട്രീയ ചരിത്രത്തിലെ തന്നെ തിളക്കമുള്ള അധ്യായമായി മാറി. അമേരിക്കൻ ചരിത്രത്തിൽ ഗവർണറായി തിരഞ്ഞെടുക്കപ്പെടുന്ന ആദ്യ കറുത്തവർഗ്ഗക്കാരിയായ വനിത എന്ന ചരിത്രനേട്ടമാണ് ഇതോടെ കെയ്ഷ സ്വന്തമാക്കിയത്. ഡൊണാൾഡ് ട്രംപ് 2024-ൽ എളുപ്പത്തിൽ വിജയിച്ച സംസ്ഥാനങ്ങളിലും ജനസാന്ദ്രതയേറിയ മേഖലകളിലും ഒരുപോലെ ഡെമോക്രാറ്റുകൾ വ്യക്തമായ മേൽക്കൈ നേടി.
മിഡ്‌ടേം തിരഞ്ഞെടുപ്പിന് മുൻപ് ആകെയുള്ള 50 സംസ്ഥാനങ്ങളിൽ 26 ഇടത്തും റിപ്പബ്ലിക്കൻ പാർട്ടി നേതാക്കളായിരുന്നു ഗവർണർമാർ. എന്നാൽ തിരഞ്ഞെടുപ്പ് ഫലങ്ങൾ പൂർണ്ണമാകുമ്പോൾ 2027-ൽ കുറഞ്ഞത് 27 സംസ്ഥാനങ്ങളിലെങ്കിലും ഡെമോക്രാറ്റിക് പാർട്ടി ഭരണം നിലവിൽ വരും. ട്രംപ് ഭരണകൂടത്തോടുള്ള കടുത്ത ജനരോഷവും വോട്ടർമാരുടെ രാഷ്ട്രീയ മാറ്റവുമാണ് റിപ്പബ്ലിക്കൻമാരുടെ ഉറച്ച കോട്ടകളിൽ വീശിയടിച്ച ഈ ഡെമോക്രാറ്റിക് തരംഗത്തിന് പിന്നിലെന്നാണ് വിലയിരുത്തപ്പെടുന്നത്.
