ടെഹ്റാൻ: ലെബനന് നേരെ ഇസ്രായേൽ നടത്തുന്ന വ്യോമാക്രമണങ്ങളിലും ഗാസയിലെ തുടർച്ചയായ സൈനിക നടപടികളിലും പ്രതിഷേധിച്ച് അമേരിക്കയുമായി നടത്തിവന്നിരുന്ന പരോക്ഷ സമാധാന ചർച്ചകൾ ഇറാൻ താത്കാലികമായി നിർത്തിവെച്ചു. ഇടനിലക്കാർ മുഖേന യു.എസ് പ്രതിനിധികളുമായി നടത്തിവന്നിരുന്ന സന്ദേശക്കൈമാറ്റങ്ങൾ നിർത്തിവെച്ചതായി ഇറാന്റെ ഔദ്യോഗിക വാർത്താ ഏജൻസിയായ തസ്നിം റിപ്പോർട്ട് ചെയ്തു. ഏപ്രിലിൽ പ്രഖ്യാപിച്ച വെടിനിർത്തൽ കരാറിന്റെ പ്രധാന നിബന്ധനകളിലൊന്ന് ലെബനനിലെ സമാധാനമായിരുന്നുവെന്നും, എന്നാൽ ഇസ്രായേൽ ഇത് എല്ലാ മുന്നണികളിലും ലംഘിക്കുകയാണെന്നും ഇറാൻ വിദേശകാര്യമന്ത്രി അബ്ബാസ് അരാഗ്ചിയും പാർലമെന്റ് സ്പീക്കർ മുഹമ്മദ് ബാഗർ ഘാലിബാഫും കുറ്റപ്പെടുത്തി. ഇറാനിയൻ തുറമുഖങ്ങൾക്ക് നേരെ അമേരിക്ക ഏർപ്പെടുത്തിയിരിക്കുന്ന ഉപരോധവും ലെബനനിലെ ഇസ്രായേൽ അധിനിവേശവും വെടിനിർത്തലിന്റെ നഗ്നമായ ലംഘനമാണെന്ന് ഇറാന്റെ ഉന്നത നയതന്ത്രജ്ഞർ ചൂണ്ടിക്കാട്ടുന്നു.
ഗാസയിലും ലെബനനിലും സയണിസ്റ്റ് ഭരണകൂടം നടത്തുന്ന ക്രൂരമായ സൈനിക നീക്കങ്ങൾ ഉടനടി അവസാനിപ്പിക്കുകയും ലെബനനിലെ കൈയേറിയ പ്രദേശങ്ങളിൽ നിന്ന് ഇസ്രായേൽ സൈന്യം പൂർണ്ണമായി പിന്മാറുകയും വേണമെന്നാണ് ഇറാന്റെ പ്രധാന ആവശ്യം. ഇറാനും പ്രതിരോധ സഖ്യങ്ങളും മുന്നോട്ടുവെക്കുന്ന ഈ ആവശ്യങ്ങൾ അംഗീകരിക്കാതെ അമേരിക്കയുമായി ഇനി യാതൊരുവിധ ചർച്ചകൾക്കും തയ്യാറല്ലെന്ന് ഇസ്ലാമിക് റവല്യൂഷനറി ഗാർഡ് കോർപ്സുമായി അടുത്ത വൃത്തങ്ങൾ വ്യക്തമാക്കി. ഇസ്രായേൽ ആക്രമണങ്ങൾ അവസാനിപ്പിച്ചില്ലെങ്കിൽ ഹോർമുസ് കടലിടുക്ക് പൂർണ്ണമായി അടച്ചിടുമെന്നും ബാബ് അൽമന്ദബ് ഉൾപ്പെടെയുള്ള മേഖലകളിൽ പുതിയ യുദ്ധമുന്നണികൾ തുറക്കുമെന്നും ഐ.ആർ.ജി.സിയുടെ ഇന്റലിജൻസ് വിഭാഗം മുന്നറിയിപ്പ് നൽകിയിട്ടുണ്ട്. ലെബനനിലെയും ഗാസയിലെയും ചുവപ്പുരേഖകൾ മറികടന്നാൽ അത് നേരിട്ടുള്ള യുദ്ധമായി കണക്കാക്കുമെന്നാണ് ഇറാന്റെ നിലപാട്.
എന്നാൽ, ഇറാൻ ചർച്ചകളിൽ നിന്നും പിന്മാറിയെന്ന വാർത്തകൾ പുറത്തുവന്നതിന് തൊട്ടുപിന്നാലെ സ്ഥിതിഗതികൾ ശാന്തമാക്കാൻ യു.എസ് പ്രസിഡന്റ് ഡൊണാൾഡ് ട്രംപ് നേരിട്ട് രംഗത്തെത്തി. ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവുമായി താൻ അതീവ നിർണ്ണായകമായ ഫോൺ ചർച്ച നടത്തിയെന്നും ബെയ്റൂട്ടിലേക്ക് ഇനി ഇസ്രായേൽ സൈന്യം നീങ്ങില്ലെന്ന് ഉറപ്പുലഭിച്ചതായും ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴി അവകാശപ്പെട്ടു. ഇതിനുപുറമെ, പ്രത്യേക പ്രതിനിധികൾ മുഖേന ലെബനനിലെ ഹിസ്ബുല്ല നേതൃത്വവുമായും താൻ സംസാരിച്ചുവെന്നും, പരസ്പരം ആക്രമിക്കില്ലെന്ന് ഇരുവിഭാഗവും സമ്മതിച്ചതായും ട്രംപ് വ്യക്തമാക്കി. അമേരിക്ക ‘വിദേശ ഭീകരസംഘടന’യായി പ്രഖ്യാപിച്ച ഹിസ്ബുല്ലയുമായി ഒരു യു.എസ് പ്രസിഡന്റ് നേരിട്ട് ചർച്ച നടത്തുന്നത് ഇതാദ്യമായാണ്. ഇറാനുമായുള്ള ചർച്ചകൾ അതിവേഗം പുരോഗമിക്കുകയാണെന്നും വിമർശകർ മാറിനിന്ന് കാര്യങ്ങൾ വീക്ഷിച്ചാൽ മതിയെന്നും ട്രംപ് കുറിച്ചു. എന്നാൽ, തെക്കൻ ലെബനനിൽ മുൻ നിശ്ചയിച്ച പ്രകാരം സൈനിക നടപടികൾ തുടരുമെന്നാണ് ഇസ്രായേൽ പ്രധാനമന്ത്രി നെതന്യാഹു ഇതിന് പിന്നാലെ പ്രതികരിച്ചത്.
