റിയാദ്: സൗദി അറേബ്യയിലെ കിഴക്കൻ പ്രവിശ്യയിലുള്ള അൽ-ഖഫ്ജി ഗവർണറേറ്റിൽ സമുദ്രമധ്യത്തിൽ ബോട്ട് തകരാറിലായി കുടുങ്ങിപ്പോയ ഗൾഫ് പൗരനെ ബോർഡർ ഗാർഡ് തിരച്ചിൽ-രക്ഷാസേന വിജയകരമായി രക്ഷപ്പെടുത്തി. അപകടത്തിൽപ്പെട്ടയാൾക്ക് ആവശ്യമായ അടിയന്തര സഹായങ്ങളും വൈദ്യസഹായവും സേന ലഭ്യമാക്കി.
കടൽമാർഗ്ഗവും തീരദേശ മേഖലകളും ഉപയോഗിക്കുന്ന പൊതുജനങ്ങളും വിനോദസഞ്ചാരികളും സമുദ്ര സുരക്ഷാ നിർദ്ദേശങ്ങൾ കർശനമായി പാലിക്കണമെന്ന് ജനറൽ ഡയറക്ടറേറ്റ് ഓഫ് ബോർഡർ ഗാർഡ് അഭ്യർത്ഥിച്ചു. യാത്രാ ആരംഭിക്കുന്നതിന് മുമ്പ് ബോട്ടുകളുടെയും യാനങ്ങളുടെയും സാങ്കേതിക ക്ഷമത ഉറപ്പുവരുത്തണമെന്നും ജീവൻ രക്ഷാ ജാക്കറ്റുകൾ നിർബന്ധമായും ധരിക്കണമെന്നും അധികൃതർ മുന്നറിയിപ്പ് നൽകി.
കടലിലോ തീരങ്ങളിലോ ഉണ്ടാകുന്ന അടിയന്തര സാഹചര്യങ്ങളിൽ സഹായത്തിനായി മക്ക, മദീന, റിയാദ്, ഈസ്റ്റേൺ പ്രവിശ്യകളിൽ ഉള്ളവർ 911 എന്ന നമ്പറിലും, രാജ്യത്തെ മറ്റ് മേഖലകളിലുള്ളവർ 994 എന്ന നമ്പറിലും ബോർഡർ ഗാർഡിനെ ബന്ധപ്പെടണമെന്ന് അധികൃതർ അറിയിച്ചു.
