അലഹബാദ്: സ്കൂളിൽ ശിരോവസ്ത്രം ധരിക്കാൻ അനുവാദം തേടി മുസ്ലിം വിദ്യാർഥിനി നൽകിയ ഹർജി തള്ളിക്കൊണ്ടുള്ള അലഹബാദ് ഹൈക്കോടതിയുടെ ചില നിരീക്ഷണങ്ങളെ വിമർശിച്ച് ബി.ജെ.പി രംഗത്ത്. ആര് എന്ത് ധരിക്കണമെന്ന് തീരുമാനിക്കേണ്ടത് കോടതികളല്ലെന്നും, സ്കൂളുകളിലെ വസ്ത്രധാരണം സംബന്ധിച്ച വിഷയം അവിടുത്തെ അധികൃതർ തന്നെ തീരുമാനിക്കട്ടെയെന്നും ബി.ജെ.പി ദേശീയ വക്താവ് സയ്യിദ് സഫർ ഇസ്ലാം വാർത്താ ഏജൻസിയായ പി.ടി.ഐയോട് വ്യക്തമാക്കി.
വ്യക്തിപരമായ താല്പര്യങ്ങൾക്കനുസരിച്ച് സ്കൂളിലെ യൂനിഫോം രീതികൾ മാറ്റാൻ അവകാശമില്ലെന്ന് വ്യക്തമാക്കിയാണ് ആഗസ്റ്റ് 21-ന് ജസ്റ്റിസുമാരായ ജെ.ജെ. മുനീർ, ഇന്ദ്രജിത് ശുക്ല എന്നിവരടങ്ങിയ ബെഞ്ച് പ്ലസ് ടു വിദ്യാർഥിനിയുടെ ഹർജി തള്ളിയത്. ശിരോവസ്ത്രം ഇസ്ലാമിക വിശ്വാസത്തിന്റെ അത്യന്താപേക്ഷിതമായ ഭാഗമല്ലെന്നും ധരിച്ചില്ലെങ്കിൽ വിശ്വാസം അപകടത്തിലാകില്ലെന്നുമായിരുന്നു കോടതിയുടെ പരാമർശം.
എന്നാൽ, ഭരണഘടന എല്ലാവർക്കും സ്വന്തം വിശ്വാസമനുസരിച്ച് ജീവിക്കാനും വസ്ത്രം ധരിക്കാനും സ്വാതന്ത്ര്യം നൽകുന്നുണ്ടെന്നും കോടതി ഇത്തരത്തിലുള്ള ഉത്തരവുകൾ പുറപ്പെടുവിക്കുന്നത് സങ്കീർണ്ണമായ പ്രശ്നങ്ങൾക്ക് കാരണമാകുമെന്നും സഫർ ഇസ്ലാം ചൂണ്ടിക്കാട്ടി. അതേസമയം, ഹൈക്കോടതി വിധിക്കെതിരെ ഓൾ ഇന്ത്യ മജ്ലിസ്-ഇ-ഇത്തിഹാദുൽ മുസ്ലിമീൻ (എ.ഐ.എം.ഐ.എം) അധ്യക്ഷൻ അസദുദ്ദീൻ ഉവൈസിയും രൂക്ഷവിമർശനം ഉന്നയിച്ചു.
അലഹബാദ് ഹൈക്കോടതിയുടെ ഈ ഉത്തരവ് ഭരണഘടന ഉറപ്പുനൽകുന്ന 19, 25 ആർട്ടിക്കിളുകളുടെ ലംഘനമാണെന്നും, ഇസ്ലാമിൽ ഏതാണ് അത്യന്താപേക്ഷിതം എന്ന് തീരുമാനിക്കാൻ ജഡ്ജിമാർക്ക് അവകാശമില്ലെന്നും ഉവൈസി കൂട്ടിച്ചേർത്തു. പ്രയാഗ്രാജിലെ സ്വകാര്യ സ്കൂളിൽ ആറാം ക്ലാസ് മുതൽ തട്ടമിട്ട് പഠിച്ചിരുന്ന ഹർജിക്കാരി പ്ലസ് വണ്ണിലേക്ക് പ്രവേശനം തേടിയപ്പോഴാണ് വിദ്യാലയം വിലക്കേർപ്പെടുത്തിയതിനെ തുടർന്ന് കോടതിയെ സമീപിച്ചത്.
