ബംഗളൂരു: കർണാടകയിലെ സർക്കാർ പരിപാടികളിൽ ‘വന്ദേ മാതരം’ ഗാനത്തിന്റെ ആദ്യ രണ്ട് പദ്യങ്ങൾ മാത്രമേ ആലപിക്കൂവെന്ന് മുഖ്യമന്ത്രി ഡി.കെ. ശിവകുമാർ വ്യക്തമാക്കി. കോൺഗ്രസ് കൈക്കൊണ്ട ഈ നയപരമായ തീരുമാനത്തിൽ താൻ ഉറച്ചുനിൽക്കുന്നതായും അദ്ദേഹം കൂട്ടിച്ചേർത്തു. സ്വാതന്ത്ര്യദിനാഘോഷ ചടങ്ങിൽ ‘വന്ദേ മാതരം’ പൂർണമായി ആലപിച്ചതിനെക്കുറിച്ചുള്ള ചോദ്യത്തോട് പ്രതികരിക്കുകയായിരുന്നു അദ്ദേഹം. തന്റെ അറിവില്ലാതെയാണ് അത്തരമൊരു സംഭവം ഉണ്ടായതെന്നും ഇനി വരുന്ന സർക്കാർ പരിപാടികളിൽ നേരത്തെ നിശ്ചയിച്ച നിലപാട് തന്നെ തുടരുമെന്നും ശിവകുമാർ വ്യക്തമാക്കി.
പൊതുപരിപാടികളിലും ദേശീയ ചടങ്ങുകളിലും ഗാനത്തിന്റെ ആദ്യ രണ്ട് പദ്യങ്ങൾ മാത്രം ആലപിക്കണമെന്ന 1937-ലെ കോൺഗ്രസ് വർക്കിങ് കമ്മിറ്റി തീരുമാനത്തിന് കഴിഞ്ഞയാഴ്ച വീണ്ടും അംഗീകാരം നൽകിയിരുന്നു. ഗാനത്തിന്റെ തുടർന്നുള്ള വരികളിൽ ഹിന്ദു ദേവതകളെക്കുറിച്ചുള്ള പരാമർശങ്ങൾ ഉള്ളതിനാൽ മറ്റു സമുദായങ്ങൾക്ക് എതിർപ്പുണ്ടാകാതിരിക്കാനാണ് ഈ നിലപാടെന്നാണ് കോൺഗ്രസ് വ്യക്തമാക്കുന്നത്. എന്നാൽ എല്ലാ പദ്യങ്ങളും നിർബന്ധമാക്കുന്ന പുതിയ ‘വന്ദേ മാതരം’ ബില്ലിനെച്ചൊല്ലി കോൺഗ്രസും ബി.ജെ.പിയും തമ്മിൽ രാഷ്ട്രീയ പോര് കടുക്കുകയാണ്. കോൺഗ്രസിന്റെ ഈ തീരുമാനം ദേശീയഗാനത്തെ അപമാനിക്കുന്നതാണെന്നാണ് ബി.ജെ.പിയുടെ ആരോപണം.
ഇന്ത്യയുടെ വൈവിധ്യത്തെക്കുറിച്ചും ‘ഹിന്ദു-ഹിന്ദുത്വ’ ചർച്ചകളെക്കുറിച്ചും ശിവകുമാർ പ്രതികരിച്ചു. വിവിധ ഭാഷകളും സംസ്കാരങ്ങളും ഉൾക്കൊള്ളുന്ന ഇന്ത്യയിലെ എല്ലാ വിഭാഗങ്ങളെയും ഒപ്പം കൊണ്ടുപോകാനാണ് കോൺഗ്രസ് ആഗ്രഹിക്കുന്നതെന്നും എന്നാൽ ബി.ജെ.പി പ്രീണന രാഷ്ട്രീയമാണ് നടത്തുന്നതെന്നും അദ്ദേഹം ആരോപിച്ചു. സൂര്യൻ, വായു, വെള്ളം, സസ്യങ്ങൾ എന്നിവയ്ക്ക് മതമില്ലെന്നും എല്ലാവരും ഒരേ വായു ശ്വസിക്കുകയും ഒരേ വെള്ളം കുടിക്കുകയും ചെയ്യുന്നവരാണെന്നും വ്യക്തമാക്കിയ അദ്ദേഹം, രാജ്യത്തെ എല്ലാ മനുഷ്യരെയും ഒരുപോലെ ബഹുമാനിക്കണമെന്ന നിലപാടാണ് തനിക്കുള്ളതെന്ന് കൂട്ടിച്ചേർത്തു.
