കൊച്ചി: എസ്.എൻ.ഡി.പി യോഗം മൈക്രോ ഫിനാന്സ് തട്ടിപ്പ് കേസില് പ്രോസിക്യൂഷന് അനുമതി നല്കുന്നതില് കാലതാമസം വരുത്തുന്ന സംസ്ഥാന സര്ക്കാരിനെതിരെ രൂക്ഷവിമര്ശനവുമായി ഹൈക്കോടതി. കേസിൽ ചില പ്രതികളെ മാത്രം പ്രോസിക്യൂഷനിൽ നിന്ന് രക്ഷിക്കാൻ ശ്രമിക്കുന്നത് എന്തിനാണെന്നും, താത്പര്യമില്ലാത്ത ചിലർക്കെതിരെ മാത്രം നടപടിയെടുക്കുകയും മറ്റു ചിലരെ സംരക്ഷിക്കുകയും ചെയ്യുന്ന ഇത്തരം പക്ഷപാതപരമായ സമീപനത്തിന്റെ അടിസ്ഥാനമെന്താണെന്നും ജസ്റ്റിസ് എ. ബദറുദ്ദീൻ കേസ് പരിഗണിക്കവെ ചോദിച്ചു.
കോടതിയുടെ മുൻ ഉത്തരവുകൾ പാലിക്കപ്പെടാത്തതിനെ തുടർന്ന് പിന്നോക്ക വികസന വകുപ്പ് അഡീഷനൽ ചീഫ് സെക്രട്ടറി നേരിട്ട് ഹാജരാകാൻ ഹൈക്കോടതി ഉത്തരവിട്ടിരുന്നു. കേസ് ഫയലുകൾ തൊട്ടുമുൻപത്തെ ദിവസം വൈകുന്നേരമാണ് തനിക്ക് ലഭിച്ചതെന്നും ഉത്തരവിനെക്കുറിച്ച് വൈകിയാണ് അറിഞ്ഞതെന്നും അഡീഷനൽ ചീഫ് സെക്രട്ടറി കോടതിയെ അറിയിച്ചപ്പോഴാണ് ഭരണകൂടത്തിന്റെ നിലപാടിനെതിരെ കോടതി രൂക്ഷമായ പ്രഹരമുന്നയിച്ചത്. ഇത്തരം മനഃപൂർവ്വമായ കാലതാമസങ്ങൾ അംഗീകരിക്കാനാവില്ലെന്നും തടസ്സവാദങ്ങൾ ആവർത്തിച്ചാൽ കർശന നടപടിയെടുക്കാൻ കോടതിക്ക് സാധിക്കുമെന്നും ബെഞ്ച് ഓർമ്മിപ്പിച്ചു.
വിഷയത്തിൽ അടുത്ത ആഴ്ചയ്ക്കുള്ളിൽ വ്യക്തമായ തീരുമാനമെടുത്ത് റിപ്പോർട്ട് സമർപ്പിക്കാൻ ഉദ്യോഗസ്ഥയ്ക്ക് കോടതി നിർദ്ദേശം നൽകി. വെള്ളാപ്പള്ളി നടേശൻ ഉൾപ്പെടെയുള്ളവർ പ്രതികളായ കേസിൽ വിജിലൻസ് നൽകിയ പ്രോസിക്യൂഷൻ അനുമതി അപേക്ഷയിൽ തീരുമാനമെടുക്കാതെ ദീർഘകാലമായി നീട്ടിക്കൊണ്ടുപോകുന്നതിലാണ് കോടതിയുടെ ഈ രൂക്ഷമായ ഇടപടൽ.
