ബെംഗളൂരു: സംസ്ഥാന സർക്കാരിന് കീഴിലുള്ള ഔദ്യോഗിക പരിപാടികളിലും ചടങ്ങുകളിലും ദേശീയ ഗാനമായ ‘വന്ദേമാതരം’ ആലപിക്കുമ്പോൾ ആദ്യത്തെ രണ്ട് ചരണങ്ങൾ മാത്രം ഉൾപ്പെടുത്തിയാൽ മതിയെന്ന് കർണ്ണാടക സർക്കാർ ഉത്തരവിട്ടു. സംസ്ഥാന മന്ത്രിസഭാ യോഗത്തിന്റെ തീരുമാനത്തിന് പിന്നാലെ ഉദ്യോഗസ്ഥ ഭരണപരിഷ്കാര വകുപ്പാണ് (DIPR) ഇതുസംബന്ധിച്ച പുതിയ മാർഗ്ഗനിർദ്ദേശം പുറത്തിറക്കിയത്. എന്നാൽ രാഷ്ട്രപതി, ഉപരാഷ്ട്രപതി, പ്രധാനമന്ത്രി, ഗവർണർ തുടങ്ങിയ ഉന്നത ഭരണഘടനാ പദവിയിലുള്ളവർ പങ്കെടുക്കുന്ന പ്രത്യേക പരിപാടികളിൽ പൂർണ്ണ രൂപം ആലപിക്കാമെന്ന് ഉത്തരവിൽ വ്യക്തമാക്കുന്നുണ്ട്.
ഇന്ത്യൻ സ്വാതന്ത്ര്യസമര കാലഘട്ടത്തിൽ രാജ്യത്തുടനീളം ദേശീയതയും ഐക്യദാർഢ്യവും ദേശസ്നേഹവും വളർത്തുന്നതിൽ വന്ദേമാതരം നിർണ്ണായക പങ്കുവഹിച്ചതായി ഉത്തരവിന്റെ ആമുഖത്തിൽ സ്മരിക്കുന്നുണ്ട്. സർക്കാർ പരിപാടികളിൽ ഗാനം ആലപിക്കുമ്പോൾ കൃത്യമായ പ്രോട്ടോക്കോളും അർഹമായ അന്തസ്സും ഏകീകൃതതയും ഉറപ്പുവരുത്താനാണ് ഈ പുതിയ നീക്കമെന്ന് സംസ്ഥാന സർക്കാർ വിശദീകരിച്ചു.
വന്ദേമാതരത്തിന്റെ ആദ്യ രണ്ട് ചരണങ്ങൾ മാത്രം ഔദ്യോഗികമായി ആലപിച്ചാൽ മതിയെന്ന 1937-ലെ കോൺഗ്രസ് വർക്കിങ് കമ്മിറ്റി പ്രമേയം നടപ്പാക്കാൻ അടുത്തിടെ തീരുമാനമെടുത്തിരുന്നു. ഇതിന് തൊട്ടുപിന്നാലെയാണ് കർണ്ണാടകയിലെ കോൺഗ്രസ് സർക്കാരും സമാനമായ തീരുമാനത്തിലേക്ക് എത്തിയത്. നടപടിയെ വിമർശിച്ച് ബി.ജെ.പി രംഗത്തെത്തിയിട്ടുണ്ടെങ്കിലും വി.ഐ.പി ചടങ്ങുകൾ ഒഴികെയുള്ള സംസ്ഥാനത്തെ എല്ലാ പൊതുപരിപാടികൾക്കും സർക്കാരിന്റെ പുതിയ മാർഗ്ഗനിർദ്ദേശം ബാധകമായിരിക്കും.
