കോഴിക്കോട്: സി.പി.എം വിപുലീകൃത സംസ്ഥാന സമിതി യോഗത്തിൽ പാർട്ടി സംസ്ഥാന സെക്രട്ടറി എം.വി. ഗോവിന്ദനും മുൻ മുഖ്യമന്ത്രി പിണറായി വിജയനുമെതിരെ രൂക്ഷമായ വിമർശനവും ശാസനയും. പാർട്ടി സെക്രട്ടറി എന്ന നിലയിൽ തനിക്ക് നിക്ഷിപ്തമായ സംഘടനാ ചുമതലകൾ കൃത്യമായി നിർവ്വഹിക്കുന്നതിൽ എം.വി. ഗോവിന്ദൻ പരാജയപ്പെട്ടുവെന്നാണ് ചർച്ചയിൽ ഉയർന്ന പ്രധാന കുറ്റപ്പെടുത്തൽ. പ്രത്യേകിച്ച്, കണ്ണൂർ ജില്ലയിലെ സ്ഥാനാർത്ഥി നിർണ്ണയത്തിലുണ്ടായ ഗുരുതരമായ പാളിച്ചകൾക്കും തുടർന്നുള്ള തിരിച്ചടികൾക്കും വ്യക്തിപരമായും സംഘടനാപരമായും സംസ്ഥാന സെക്രട്ടറിക്ക് ഉത്തരവാദിത്തമുണ്ടെന്ന് സമിതി വ്യക്തമാക്കി.
പാർട്ടി നയരൂപീകരണത്തിലും ഭരണത്തിലുമുണ്ടായ പിഴവുകൾ പരിഹരിക്കാൻ പിണറായി വിജയൻ തന്റെ പ്രവർത്തന ശൈലി അടിയന്തരമായി മാറ്റണമെന്ന ശക്തമായ നിർദ്ദേശവും യോഗത്തിൽ ഉയർന്നു വന്നു. കഴിഞ്ഞ തിരഞ്ഞെടുപ്പുകളിൽ പാർട്ടി നേരിട്ട അപ്രതീക്ഷിത തിരിച്ചടികൾക്ക് കാരണം അണികളുടെ വീഴ്ചയല്ലെന്നും സംസ്ഥാന നേതൃത്വത്തിന്റെ സംഘടനാപരമായ പോരായ്മകളാണെന്നും ജനപ്രതിനിധികൾ ചൂണ്ടിക്കാട്ടി. സംസ്ഥാന സെക്രട്ടറിയുടെ ചില അനാവശ്യ പ്രസ്താവനകൾ പാർട്ടിയെ പൊതുസമൂഹത്തിൽ വലിയ തോതിൽ പ്രതിരോധത്തിലാക്കിയെന്നും തളിപ്പറമ്പിൽ പി.കെ. ശ്യാമളയുടെ സ്ഥാനാർത്ഥിത്വവും തുടർന്നുണ്ടായ പരാജയവുമാണ് ഗോവിന്ദനെതിരായ അമർഷത്തിന് ആക്കം കൂട്ടിയതെന്നും പ്രതിനിധികൾ വ്യക്തമാക്കി.
പാർട്ടിയെയും സംഘടനയെയും അടിമുടി അഴിച്ചുപണിയുക എന്ന ലക്ഷ്യത്തോടെ നടന്ന മണിക്കൂറുകൾ നീണ്ട ചർച്ചകൾക്കൊടുവിലാണ് സംസ്ഥാന സെക്രട്ടേറിയറ്റിലും സംസ്ഥാന സമിതിയിലും പുനഃസംഘടന നടത്താൻ അടിയന്തര തീരുമാനമുണ്ടായത്. തുടർച്ചയായ തിരഞ്ഞെടുപ്പ് തോൽവികളുടെ പശ്ചാത്തലത്തിൽ, ഉയർന്ന നേതാക്കളുടെ ആഡംബര ജീവിതശൈലിയും ജനങ്ങളിൽ നിന്നുള്ള അകൽച്ചയും പാർട്ടി പ്രതിച്ഛായയെ ബാധിച്ചതായി സമിതി വിലയിരുത്തി. അതേസമയം, കോഴിക്കോട്ട് നടക്കുന്ന വിശാല സംസ്ഥാന സമിതി യോഗത്തിന്റെ ഭാഗമായി പാർട്ടി ശക്തിവിളിച്ചോതി വൈകിട്ട് കോഴിക്കോട് ബീച്ചിൽ വൻ ബഹുജന റാലിയും സംഘടിപ്പിച്ചിട്ടുണ്ട്.
