നഗോയ: ഏഷ്യൻ ഗെയിംസ് ഗുസ്തി ഗോദയിൽ ലോക ചാമ്പ്യനെ വീഴ്ത്തി ഇന്ത്യയ്ക്ക് വീണ്ടും സ്വർണത്തിളക്കം. പുരുഷന്മാരുടെ 57 കിലോഗ്രാം ഫ്രീസ്റ്റൈൽ വിഭാഗത്തിൽ നിലവിലെ ലോക ചാമ്പ്യനായ ഉത്തര കൊറിയയുടെ ഹാൻ ചോങ് സോങ്ങിനെ കീഴടക്കിയാണ് ഇന്ത്യൻ താരം അമൻ സെഹ്‌റാവത്ത് സ്വർണ്ണം കരസ്ഥമാക്കിയത്. ആവേശകരവും കടുത്ത പോരാട്ടവും കണ്ട ഫൈനൽ മത്സരത്തിൽ 11-7 എന്ന സ്കോറിനാണ് അമൻ സ്വർണ്ണനേട്ടം സ്വന്തമാക്കിയത്. 2022-ൽ നടന്ന ഹാങ്ചൗ ഏഷ്യൻ ഗെയിംസിൽ ഇതേ ഇനത്തിൽ അമൻ വെങ്കലം നേടിയിരുന്നു.
മത്സരത്തിന്റെ തുടക്കത്തിൽ തന്നെ കൃത്യമായ ലീഡ് നേടാൻ അമനായിരുന്നെങ്കിലും, പരിക്കിനെ തുടർന്നുള്ള ഇടവേളയ്ക്ക് ശേഷം ഉത്തര കൊറിയൻ താരം ശക്തമായി തിരിച്ചടിച്ച് ലീഡ് ഉയർത്തിയിരുന്നു. എന്നാൽ കളി അവസാനിക്കാൻ മിനിറ്റുകൾ മാത്രം ബാക്കിനിൽക്കെ മിന്നുന്ന പ്രകടന പുറത്തെടുത്ത അമൻ, എതിരാളിയെ മലർത്തിയടിച്ച് തിരിച്ചു വരികയും സ്വർണ്ണം ഉറപ്പിക്കുകയുമായിരുന്നു. അതേസമയം, വനിതകളുടെ 53 കിലോഗ്രാം വിഭാഗം ഫൈനലിൽ പോരാടിയ ഇന്ത്യയുടെ ആന്റിം പംഗൽ വെള്ളി മെഡൽ നേടി. ജപ്പാന്റെ മുൻ ലോക ചാമ്പ്യൻ മോയെ കിയൂക്കയോടാണ് ഫൈനലിൽ ആന്റിം പരാജയപ്പെട്ടത് (9-1).
ഇതോടെ ഇത്തവണത്തെ ഏഷ്യൻ ഗെയിംസ് ഗുസ്തിയിൽ ഇന്ത്യയുടെ ആകെ മെഡൽ നേട്ടം ആറായി ഉയർന്നു. നേരത്തെ പുരുഷന്മാരുടെ 65 കിലോഗ്രാം ഫ്രീസ്റ്റൈലിൽ സുജീത് ഇന്ത്യക്കായി സ്വർണം കരസ്ഥമാക്കിയിരുന്നു. ഗ്രീക്കോ റോമൻ 97 കിലോഗ്രാം വിഭാഗത്തിൽ നിതേഷ് വെള്ളിയും ഫ്രീസ്റ്റൈൽ 97 കിലോഗ്രാമിൽ ദീപക് പുനിയ, ഗ്രീക്കോ റോമൻ 87 കിലോഗ്രാമിൽ സുനിൽ കുമാർ എന്നിവർ വെങ്കല മെഡലുകളും നേടി കായികരംഗത്ത് രാജ്യത്തിന്റെ അഭിമാനമുയർത്തി.
