ഏദൻ: യമനിലെ അന്താരാഷ്ട്ര തലത്തിൽ അംഗീകരിക്കപ്പെട്ട സർക്കാറിന്റെ താത്കാലിക ആസ്ഥാനമായ ഏദൻ അന്താരാഷ്ട്ര വിമാനത്താവളത്തിന് (Aden International Airport) നേരെ ഹൂതി സായുധ സംഘത്തിന്റെ കടുത്ത ആക്രമണം. ബുധനാഴ്ച പുലർച്ചെ രണ്ട് ബാല്ലിസ്റ്റിക് മിസൈലുകളും സ്ഫോടകവസ്തുക്കൾ നിറച്ച നിരവധി ഡ്രോണുകളും ഉപയോഗിച്ചാണ് ഹൂതികൾ വിമാനത്താവളം ലക്ഷ്യമിട്ട് ആക്രമണം നടത്തിയതെന്ന് യമൻ ഗതാഗത മന്ത്രാലയം ഔദ്യോഗിക പ്രസ്താവനയിലൂടെ വ്യക്തമാക്കി.
കെയ്‌റോയിൽ നിന്ന് ഏദനിലേക്ക് യാത്രക്കാരുമായി എത്തുകയായിരുന്ന യമനിയ വിമാനം (Yemenia flight 603) റൺവേയിൽ ഇറങ്ങാൻ മിനിറ്റുകൾ മാത്രം ബാക്കിനിൽക്കെയാണ് മിസൈലുകളിൽ ഒന്ന് വിമാനത്താവളത്തിന് തൊട്ടടുത്തായി പതിച്ചത്. ഭീഷണി നേരിട്ടതോടെ വിമാനത്തിന്റെ ലാൻഡിംഗ് അടിയന്തരമായി റദ്ദാക്കുകയും സൗദി അറേബ്യയിലെ ജിദ്ദ വിമാനത്താവളത്തിലേക്ക് സുരക്ഷിതമായി തിരിച്ചുവിടുകയും ചെയ്തു. നഗരത്തിന് മുകളിൽ കൂടുതൽ ഡ്രോണുകളുടെ സാന്നിധ്യം കണ്ടെത്തിയതിനെ തുടർന്ന് ടെർമിനലിലുണ്ടായിരുന്ന യാത്രക്കാരെയും ജീവനക്കാരെയും സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. കൂടാതെ വിമാനത്താവളത്തിൽ നിർത്തിയിട്ടിരുന്ന യമനിയ, ഏദൻ എയർവേയ്‌സ് എന്നിവയുടെ രണ്ട് വിമാനങ്ങൾ അപകടമേഖലയിൽ നിന്നും മാറ്റിയിട്ടു.
സിവിലിയന്മാരുടെയും വ്യോമയാന ജീവനക്കാരുടെയും ജീവൻ നേരിട്ട് അപകടത്തിലാക്കുന്ന ഗുരുതരമായ ആക്രമണമാണ് ഹൂതികൾ നടത്തിയതെന്ന് യമൻ ഗതാഗത മന്ത്രാലയം കുറ്റപ്പെടുത്തി. മേഖലയിലെ സ്ഥിതിഗതികൾ കലുഷിതമാക്കുന്ന തികച്ചും അപകടകരമായ ഈ നീക്കം സിവിലിയൻ ഏവിയേഷൻ രംഗത്തിന് തന്നെ വലിയ ഭീഷണിയാണെന്ന് മന്ത്രാലയം ചൂണ്ടിക്കാട്ടി. ഏദൻ വിമാനത്താവളം യാത്രക്കാർക്കും ജീവനക്കാർക്കും ഭയരഹിതമായി ഉപയോഗിക്കാനുള്ള സുരക്ഷിത കേന്ദ്രമായി നിലനിൽക്കണമെന്നും അല്ലാതെ ഭീഷണികളുടെയും ഭീതിയുടെയും യുദ്ധക്കളമായി മാറ്റരുതെന്നും പ്രസ്താവനയിൽ ആവശ്യപ്പെട്ടു.
