റിയാദ്: സൗദി അറേബ്യയിലെ അബ്ഹ, റിയാദ് അന്താരാഷ്ട്ര വിമാനത്താവളങ്ങൾ ലക്ഷ്യമാക്കി ഹൂതി സായുധ സംഘം നടത്തിയ ആക്രമണങ്ങളിൽ രണ്ട് വിദേശ വനിതകൾ ഉൾപ്പെടെ മൂന്ന് പേർ കൊല്ലപ്പെട്ടു. സംഭവത്തിൽ ഡസൻ കണക്കിന് ആളുകൾക്ക് പരുക്കേറ്റതായി സൗദി ജനറൽ അതോറിറ്റി ഓഫ് സിവിലിയൻ ഏവിയേഷൻ ബുധനാഴ്ച പ്രസ്താവനയിലൂടെ സ്ഥിരീകരിച്ചു.
യമൻ അതിർത്തിയോട് ചേർന്നുള്ള അസീർ പ്രവിശ്യയിലെ അബ്ഹ അന്താരാഷ്ട്ര വിമാനത്താവളത്തിന് നേരെ ചൊവ്വാഴ്ചയുണ്ടായ ആക്രമണത്തിൽ മൊറോക്കൻ, അൾജീരിയൻ സ്വദേശികളായ രണ്ട് സ്ത്രീകളാണ് കൊല്ലപ്പെട്ടത്. ഈ ആക്രമണത്തിൽ ബംഗ്ലാദേശ്, ഫിലിപ്പീൻസ് പൗരന്മാർ ഉൾപ്പെടെ 28 പേർക്ക് പരുക്കേറ്റു. ഇതിൽ പലരുടെയും പരുക്കുകൾ ഗുരുതരമാണ്. ബുധനാഴ്ച റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ ആക്രമണത്തിൽ ഒരു സുഡാനി പൗരൻ കൊല്ലപ്പെടുകയും ഈജിപ്ഷ്യൻ, പാകിസ്താനി പൗരന്മാർ ഉൾപ്പെടെ എട്ട് പേർക്ക് പരുക്കേൽക്കുകയും ചെയ്തു. പരുക്കേറ്റവരെയെല്ലാം അടിയന്തരമായി തൊട്ടടുത്ത ആശുപത്രികളിലേക്ക് മാറ്റി.
ആക്രമണങ്ങളിൽ ഇരു വിമാനത്താവള സമുച്ചയങ്ങൾക്കും നാശനഷ്ടങ്ങൾ സംഭവിച്ചിട്ടുണ്ട്. ഇതിന്റെ പൂർണ്ണമായ വ്യാപ്തി അതോറിറ്റി വിലയിരുത്തി വരികയാണ്. യാത്രാക്കാരുടെയും ജീവനക്കാരുടെയും സുരക്ഷ ഉറപ്പാക്കാനും രാജ്യത്തെ സിവിൽ ഏവിയേഷൻ സംവിധാനം തടസ്സമില്ലാതെ മുന്നോട്ട് കൊണ്ടുപോകാനും ആവശ്യമായ എല്ലാ മുൻകരുതലുകളും സ്വീകരിച്ചിട്ടുണ്ടെന്ന് അധികൃതർ അറിയിച്ചു.
അതിനിടെ, ബുധനാഴ്ച രാവിലെയോടെ റിയാദിന് വടക്കൻ മേഖലയിലേക്ക് ഹൂതികൾ തൊടുത്തുവിട്ട മറ്റൊരു ബാല്ലിസ്റ്റിക് മിസൈൽ സൗദി വ്യോമപ്രതിരോധ സേന തകർത്തിരുന്നു. തുടർന്ന് ബുധനാഴ്ച വൈകുന്നേരത്തോടെ, സൗദിക്കെതിരെ പുതിയ ആക്രമണത്തിന് തയ്യാറെടുക്കുകയായിരുന്ന യമൻ തലസ്ഥാനമായ സനായിലെ ഹൂതി മിസൈൽ വിക്ഷേപണ തറ സഖ്യസേന തിരിച്ചടിയിലൂടെ പൂർണ്ണമായും തകർത്തതായി വക്താവ് മേജർ ജനറൽ തുർക്കി അൽ മാലികി സ്ഥിരീകരിച്ചു.
