ലണ്ടൻ: യുണൈറ്റഡ് അറബ് എമിറേറ്റ്സിലെ (യു.എ.ഇ) അൽ ജസീറയ്ക്ക് 13 നോട്ടിക്കൽ മൈൽ പടിഞ്ഞാറ് മാറി പനാമ പതാക ഘടിപ്പിച്ച ‘ജെം നമ്പർ 2’ (GEM NO.2) എന്ന ക്രൂഡ് ഓയിൽ സൂപർടാങ്കറിന് നേരെ അജ്ഞാത വസ്തു പതിച്ച് ആക്രമണം. ആക്രമണത്തെ തുടർന്ന് കപ്പലിൽ തീപിടിത്തമുണ്ടായെങ്കിലും പിന്നീട് അണച്ചതായി ബ്രിട്ടീഷ് നാവികസേനയുടെ അധീനതയിലുള്ള യു.കെ.എം.ടി.ഒ (UKMTO) സ്ഥിരീകരിച്ചു. ആക്രമണത്തിന്റെ ഉത്തരവാദിത്തം തൽക്കാലം ആരും ഏറ്റെടുത്തിട്ടില്ലെങ്കിലും, ഹോർമുസ് കടലിടുക്കിന് പുറത്ത് നടന്ന ഈ ആക്രമണം കടൽമാർഗ്ഗമുള്ള ചരക്ക് നീക്കത്തിൽ അപകടസാധ്യത വർധിപ്പിക്കുന്നതായി കടൽ സുരക്ഷാ ഏജൻസികൾ വ്യക്തമാക്കുന്നു.
പൂർണ്ണമായും എണ്ണ ശേഖരിച്ച നിലയിലുള്ള കപ്പലിന്റെ ജീവനക്കാരുടെ നിലവിലെ അവസ്ഥയെക്കുറിച്ചോ സംഭവിച്ച നാശനഷ്ടങ്ങളെക്കുറിച്ചോ കൂടുതൽ വിവരങ്ങൾ ലഭ്യമായിട്ടില്ല. സംഭവത്തിൽ അന്വേഷണം പുരോഗമിക്കുകയാണ്. അംഗീകാരമില്ലാത്ത കപ്പൽ പാതകൾ തടയുമെന്ന് ഇറാന്റെ പുതിയ മുന്നറിയിപ്പ് നിലനിൽക്കെ, ഹോർമുസ് കടലിടുക്കിലൂടെയുള്ള എണ്ണക്കപ്പലുകൾക്ക് നേരെയുള്ള ഭീഷണികളും ആക്രമണങ്ങളും വർധിച്ചു വരികയാണ്. കഴിഞ്ഞ ആഴ്ച ഖത്തർ തീരത്തും സമാനമായ രീതിയിൽ ടാങ്കറിന് നേരെ ആക്രമണമുണ്ടായിരുന്നു. മേഖലയിൽ ആക്രമണങ്ങൾ കടുക്കുന്ന പശ്ചാത്തലത്തിൽ, കപ്പലുകളിലെ ജീവനക്കാരോട് അതീവ ജാഗ്രത പാലിക്കാൻ യു.എസ് നാവികസേനയുടെ നേതൃത്വത്തിലുള്ള ജോയിന്റ് മാരിടൈം ഇൻഫർമേഷൻ സെന്റർ നിർദ്ദേശം നൽകിയിട്ടുണ്ട്..
