റിയാദ്: ഉംറ വിസയിൽ സൗദി അറേബ്യയിലെത്തിയ ഹൈദരാബാദ് മുസ്താബാദ് സ്വദേശി ഗൗസുദ്ദീൻ മുഹമ്മദ് (61) റിയാദിൽ മരണപ്പെട്ടു. ഉംറ കർമ്മങ്ങൾ പൂർത്തിയാക്കി പത്ത് ദിവസം മുൻപാണ് ഇദ്ദേഹവും ഭാര്യ ഖാതൂനും റിയാദിൽ ഹൗസ് ഡ്രൈവറായി ജോലി ചെയ്യുന്ന മകൻ ശാദുല്ലാഹിന്റെ വസതിയിലെത്തിയത്. കഴിഞ്ഞ വെള്ളിയാഴ്ച രാത്രി ഇദ്ദേഹത്തിന് പെട്ടെന്ന് കടുത്ത ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ബന്ധുക്കൾ അടിയന്തരമായി ആശുപത്രിയിൽ പ്രവേശിപ്പിച്ചിരുന്നു. ശനിയാഴ്ച ഉച്ചയോടെ റിയാദ് എക്സിറ്റ് ഏഴിലുള്ള അൽ ഹമ്മാദി ആശുപത്രിയിൽ അന്ത്യം സംഭവിക്കുകയായിരുന്നു.
ഐ.സി.എഫ് റീജിയണൽ സെക്രട്ടറി ഇബ്രാഹിം കരീം, ഇ.ആർ.ടി സെക്രട്ടറി റസാഖ് വയൽക്കര എന്നിവരുടെ നേതൃത്വത്തിലാണ് ഔദ്യോഗിക നടപടിക്രമങ്ങൾ ഏകോപിപ്പിച്ചത്. ഉമ്മുൽ ഹമാം മലിക് ഖാലിദ് മസ്ജിദിൽ വെച്ച് ജനാസ നമസ്കാരം നടക്കുകയും, തുടർന്ന് റിയാദിലെ ശിമാൽ മഖ്ബറയിൽ ജനാസ ഖബറടക്കുകയും ചെയ്തു. പരേതന് ഭാര്യ ഖാതൂൻ, മകൻ ശാദുല്ലാഹ് എന്നിവർക്ക് പുറമേ സമീറാ ബീഗം എന്നൊരു മകൾ കൂടിയുണ്ട്.
