കാഠ്മണ്ഡു: നേപ്പാളിൽ തിബത്ത് അതിർത്തിക്ക് സമീപമുണ്ടായ വൻ മിന്നൽ പ്രളയത്തിൽ ഒൻപത് പേർ മരണപ്പെട്ടു. റസുവ ജില്ലയിലുണ്ടായ പ്രളയത്തിൽ നിരവധി പേരെ കാണാതാകുകയും ഗ്രാമങ്ങളടക്കം ഒലിച്ചുപോയി വൻ നാശനഷ്ടങ്ങൾ സംഭവിക്കുകയും ചെയ്തു. ഭോതെ കോശി നദിയിലുണ്ടായ വെള്ളപ്പൊക്കം തിമുരെ, സ്യാപ്രു ബെസി, തിബത്തിലെ ഗ്യോറോങ് അതിർത്തി എന്നീ പ്രദേശങ്ങളെയാണ് ഗുരുതരമായി ബാധിച്ചത്. തുടർന്ന് നേപ്പാളിലും അതിർത്തി സംസ്ഥാനമായ ബിഹാറിലും അതീവ ജാഗ്രതാ നിർദേശം പുറപ്പെടുവിച്ചു. പ്രളയത്തിൽ പ്രശസ്തമായ ഫ്രണ്ട്ഷിപ്പ് പാലം തകരുകയും 430 മെഗാവാട്ടിന്റെ വൈദ്യുതി ഉത്പാദനം പൂർണമായി തടസ്സപ്പെടുകയും ചെയ്തിട്ടുണ്ട്. സൈന്യവും പോലീസും രക്ഷാപ്രവർത്തന രംഗത്തുണ്ടെങ്കിലും പ്രളയം കാരണം ഹെലികോപ്റ്ററുകൾക്ക് ഇറങ്ങാൻ സാധിച്ചിട്ടില്ല.
കനത്ത മഴ കാരണമല്ല പ്രളയമെന്നും ഗ്ലേഷ്യൽ ലേക്ക് ഔട്ട്ബസ്റ്റ് ഫ്ലഡ് (GLOF) അല്ലെങ്കിൽ തിബത്ത് ഭാഗത്തുണ്ടായ മേഘവിസ്ഫോടനമാകാം ദുരന്തത്തിന് കാരണമെന്നുമാണ് അധികൃതരുടെ നിഗമനം. തിബത്തിലെ ഗ്യോറോങ് കൗണ്ടിയിലുണ്ടായ മണ്ണിടിച്ചിലിലും ആളപായവും നാശനഷ്ടങ്ങളും റിപ്പോർട്ട് ചെയ്തിട്ടുണ്ട്. ത്രിശൂലി നദീതീരത്തുള്ള നൂവകോട്ട്, ധാഡിങ്, ഗോർഖ, ചിത്വാൻ തുടങ്ങിയ പ്രദേശങ്ങളിലുള്ളവർക്ക് കടുത്ത ജാഗ്രതാ നിർദേശം നൽകിയിട്ടുണ്ട്. നദീതീരങ്ങളിൽ താമസിക്കുന്നവർ സുരക്ഷിത സ്ഥാനങ്ങളിലേക്ക് മാറണമെന്ന് നേപ്പാൾ പ്രധാനമന്ത്രി ബലേന്ദ്ര ഷ അഭ്യർത്ഥിച്ചു. അതേസമയം, ബിഹാർ മുഖ്യമന്ത്രി സമ്രാട്ട് ചൗധരിയുടെ നേതൃത്വത്തിൽ സ്ഥിതിഗതികൾ വിലയിരുത്താൻ ഉന്നതതല യോഗം ചേർന്നിട്ടുണ്ട്. പ്രദേശത്ത് രക്ഷാപ്രവർത്തനങ്ങളും സ്ഥിതിഗതികളുടെ നിരീക്ഷണവും ഊർജ്ജിതമായി തുടരുകയാണ്.
